Nihnih awh tur Directorate of Film Festival, New Delhi, Aizawl Dictrict Deputy Commissioner leh Directorate of Information & Public Relation Department te buatsaih Film Festival in Aizawl chu vawiin khan I & PR Auditorium ah Pu B. Lalthanliana, Secretary I & PR in a hawng.

Tun hma chuan Film enna hmunpui ber Cinema Hall Aizawl-ah a awm thin a, entu pawh an tamin a lun thei hle, tunah hetiang film lam enna hmun hi khar an ni zo ta si a, mite thinlungah erawh chuan ennawm en duhna a la lian hle, chutih laia mi thahnemngai ten Mizo ziarang tilang thei tur film hrang hrang an rawn duang chhuak chu lawmawm a tih thu khuallian Pu B. Lalthanliana chuan sawiin Directorate of Film Festival, New Delhi ten Aizawlah Film Festival of Film an buatsaih chu a tha in a hlu in a. Tunah thalai lemchan lama tuimi ten kut insuiha thinlung hmunkhat pu a hma an la ho leh huang khata an lawikhawm chu fakin an hun kal zel turah tluang taka kal zel turin duhsakna a hlan a ni.

I& PR Department hian film lam tih hmasawn tumin kum 2012 atang khan thahnemngai takin hma a lo la chho tawh a, film leh lemchan lama tui mite tan training te buatsaihin Film Festival te Film Division I & B Ministry nen tangrualin an lo buatsaih tawh thin in hmasawnna nasa tak a nih thu I &PR Secretary chuan a sawi a ni.

He hunah hian Pi Indrani Bose, Deputy Director, Directorate of Film Festival chuan thusawiin Patroitic Film Festival chu thalaiten an hlawkpui ngei a rin thu a sawi a. Aizawl DC Pu Kannan Gopinathan chuan Festival a kalte zawng zawng lawmna thu a sawi bawk.

Hawnna hun hman a nih hnu hian Mizo Film ‘Pasaltha’ leh ‘Chittagong’ te thlir ho zui nghal a ni a. College naupang thahnem tak hawnna hunna ah hian an tel a ni. Naktukah Film Festival hi neih chhunzawm leh tur a ni.