Vawiin khan Lawngtlai DC Conference Hall-ah Lawngtlai DC Dr A. Muthamma IAS hovin Lawngtlaia India Republic Day vawi 68-na hman dan tur rel a ni a. Lawngtlaia sawrkar department, zirna in leh NGO hrang hrang ai awhte an tel.

Meeting chuan Republic Day lawmna hi CYLA Playground-ah chawhma dar 10:30-ah hman ni se, tiin a rel a. Kum dang ang bawkin parade contingent – armed, unarmed, school leh band party hrang hrang atanga nei lehin, endiktu leh a ti thate hnenah lawmman sem leh ni se, tih a ni.

He meeting-ah hian Republic Day lawmna tura thil pawimawh hrang hrang sawi ho niin, department leh tlawmngai pawl hrang hrangte hnenah mawhphurhna sem rual a ni a. A ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni.

He'ng bakah hian Republic Day lawmna puala volleyball leh badminton tournament buatsaih rem tih a ni a. Chhawmdawlna in thlan bikte hnenah tanpuina thilpek pek ni se, tih a ni bawk.

He hunah hian January ni 12, 2017-a Mizoram Chief Minister-in Vathuampui a tlawh huna lo dawnsawn dan tur rel nghal niin, mawhphurhna hrang hrang insem fel nghal a ni a. January ni 14, 2017-a Kut Hna Thawktute Ni hman dan tur pawh rel nghal niin, chumi atana thil tul hrang hrangte ngaihtuah ho nghal a ni bawk.