Vawiin atang khan Sawrkar laipuia Ministry of Textiles leh Mizoram Apex Handloom & Handicraft Cooperative Societry Ltd. (MAHCO) tangkawpin an buatsaih, ni 15 awh tur MAHCO Special Handloom Expo chu Transport Office building tharah neih a ni a. He hunah hian Pi Lal Riliani, President, Indian Society on Tobacco & Health (Mizoram Chapter) chu khuallian niin Expo hi a hawng a ni.

Dr. Zohmangaiha, IRS (Rtd.) kaihhruai Expo hawnna hunah hian khuallian chuan Mizo hnam a puan pawimawhna leh hmanlai hun atanga tunlai hun thlenga puan tah dan te, rawng chawih leh ze thlak dan te a lo danglam chhoh dan tarlangin, tun dinhmunah handloom design-a Mizo kan san zia leh hnamdang pawhin min hlut sak thin thu a tarlang a. Chutihrual chuan hmasawnna tur tam tak kan la neih thu sawiin, kan thimana te tipung a, kan kutchhuak te kan uluk bawk tur a ni, Pi Lal Riliani chuan a ti a. Thenawm state leh ram dangah te kan puantah engemaw zat kan thawnchhuak thin a, chungah te chuan kan kutchhuak hian Mizo hnam a keng tel tih hre reng chungin a quality tha leh belchian dawl thei ang berin kan siam thin tur a ni, tiin kalkhawmte chu a chah a. IS&TH President chuan taimak leh intodelh tur chuan hriselna a pawimawhzia sawi telin, ei leh in, zuk leh hmuam leh kan nunphungah fikhur theuh a pawimawhzia a tarlang bawk.

Vawiin hunah hian Pu S.K. Sen, Officer-in-charge, Weaver Service Centre, Aizawl, Development Commissioner for Handlooms aiawh chuan thu sawi bawkin, he Expo in a tum ber chu puan tahtu ten an kutchhuak tam zawk an hralh theih nan market zawn sak a nih thu a tarlang a ni. Ministry of Textiles hian kum 2016-2017 chhung atan Special Handloom Expo hi Mizoramah district pathum a neih a phal sak a; Kolasib ah 2016 November thla khan lo neih tawh niin, December 2016 ah Champhai ah neih a ni leh a, a tawp ber atan Aizawl-ah vawiin atang hian January ni 24, 2017 thleng neih a ni ang a, Stall 30 hawn a ni.