Vawiin khan Lawngtlai DC Conference Hall-ah Lawngtlai Bawrhsap Pu N. Chakhai MCS hovin Lawngtlaia India Republic Day vawi 70-na hman dan tur rel a ni a. Lawngtlaia sawrkar department, zirna in leh tlawmngai pawl hrang hrang ai awhte an tel.

Meeting chuan Republic Day lawmna hi CYLA Playground-ah chawhma dar 11-ah hman ni se, tiin a rel a. Kum dang ang bawkin parade contingent – armed, unarmed, school leh band party te nei lehin, endiktu leh a ti ṭhate hnenah lawmman sem leh ni se, tih a ni.

He meeting-ah hian Republic Day lawmna tura thil pawimawh hrang hrang sawi ho niin, department leh tlawmngai pawl hrang hrangte hnenah mawhphurhna sem rual a ni a. A ni-ah hian sawrkar office, zirna in leh sawrkar quarters-ah te hnam puanzar zar vek tura tih a nih bakah, sawrkar official-te chu a lawmnaa kal ngei tura tih an niin, sawrkar department hrang hrangte'n an hna thawh puanzarna tur banner siamin, Republic Day lawmna hunah hian tar ni se, tih a ni.

He'ng bakah hian Republic Day lawmna puala volleyball leh badminton tournament buatsaih rem tih a ni a. Chhawmdawlna in, jail leh damdawi inahte ṭanpuina thilpek pek leh ni se, tih a ni bawk.