No.3637/2021-2022
Aizawl Pawlkut thla ni 12, 2022: Vawiin khan Lawngtlai DC Conference Hall-ah Bawrhsap Dr Andrew H. Vanlaldika hovin Lawngtlaia Republic Day 2022 hman dan tur rel a ni a. State sawrkar leh LADC official-te leh pawl hrang hrang ai awhte an tel.

Chairman Dr Andrew H. Vanlaldika chuan COVID-19 hri leng karah fimkhur tak chungin Republic Day chu hman a tul leh dawn tih sawiin, state sawrkarina hman dan tur a ruahman dan zulzuia hman a tul tur thu a sawi a. Ram ni pawimawh a nih ang ngeia khunkhan tak si, COVID-19 laka fimkhurna dan zawm chung sia hman dan ngaihtuah turin kal khawmte chu a sawm a ni.

Meeting chuan kumin Republic Day lawmna hi Central YLA Playground-ah zing dar 8:30-ah hman ni se, tiin a rel a. Kum dang anga sikul naupang atanga parade contingent beisei a rem loh avangin guard of honour atan Mizoram Police Armed Contingent beisei an ni.

Republic Day lawmnaah hian faina intihsiakna lawmman, COVID-19 hri danna kaihhnawih chawimawina leh lawmman dangte sem a ni leh dawn a. Lawngtlai khawpui chhunga damdawi in pathum, chhawmdawlna in leh District Jail-ah te Republic Day pual tanpuina thilpek pek leh ni se, tih a ni bawk.

Republic Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk. Republic Day lawmnaah hian mipui nawlpui tan tel a rem dawn loh avangin, mipuiin in lam atanga an lo chhim theih nan cable TV kal tlanga live telecast-a pek chhuah tum a ni.

Ram ni pawimawha tih than dan pangngai angin, Republic Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni bawk.