No.3636/2021-2022

Aizawl 12th January 2022
: Vawiin chhun khan DC Conference Hall, Kolasibah him taka hrileng kar a KTP General Conference 2022 kalpui dan tur sawihona neih a ni a. Dr.H.Lalthlangliana, Deputy Commissioner-in hun kaihruaiin Central KTP hruaitute, KTP General Conference Organizing Committee leh Kolasib district-a sawrkara thu neitute an tel a ni.

Vawiin thukhawmnaah hian Kolasib district bik a hri kai dan dinhmun thlir ho niin hri kai enkawl lai mi 96 an awm mek thu leh ni 10 liamta chhung khan hri kai endik atanga kai thar hmu chhuah chu za zelah 1.98 chauh a nih tawh thu ngaihthlak a ni a. Ram pum a hri kai hmuh belh zel anih avangin fimkhurna chu uluk lehzual a kalpui chhunzawm a tul thu sawi a ni.

KTP General Conference 2022 kalpuina tur a inbuatsaih dan te ngaihthlak niin palai beisei zat turte, thlenna tur leh ei leh in buatsaih dan tur zirchianna neih a tul thu sawi a ni a. Khawmpui palaite chu Covid-19 hri an kai leh kai loh endik vek tur a nih thu leh ram pum a hri kai awm dan a zirin a hun te pawh sawn a ngaih theih thu te ngaihthlak a ni bawk.

Kolasib DC Dr.H.Lalthlangliana chuan KTP General Conference 2022 chu ruahman sa anga hlawhtling tak a kalpui nise a tih rualin hripui lak a mipui himna ngaihtuah a pawimawh tel thu a sawi a. Central KTP hruaitute chu Sawrkar inkaihhruaina leh mipuite himna ngai pawimawh chunga inbuatsaihna kalpui turin a chah bawk a ni.

Attachment

  • Loading attachment...