2649/2025-2026 

Lawngtlai, 12th December, 2025 : Vawiin chawhma dar 11:00 AM khan DC Conference Hall, Lawngtlai ah Lawngtlai District Bawrhsap Pu Donny Lalruatsanga hovin Lawngtlaia Republic Day 2026 hman dan tur relin thutkhawmna neih a ni.

Pu Donny Lalruatsanga a chuan kalkhawmte hnenah lawmthu a sawi a.Kum hmasa lam a hman dan tlangpui tarlanna neiin, chumi zul zuia kum 2026 Republic Day hman dan turah ruahmanna siam a tul thu a sawi a ni. Bawrhsap chuan Department hrang hrang hnen a mawhphurhna nghah te ti hlawhtling theuh turin a chah nghal a ni.

Thutkhawm chuan kum 2026 Republic Day lawmna chu zing dar 8:30 AM ah CYLA Playground ah hman nise, District Bawrhsap Pu Donny Lalruatsanga chu Khuallian ni se an ti a. National Anthem- hi Don Bosco School leh Govt. Region High School Brass Band ten tum se tih a ni a. Republic Day lawmna Ceremonial Parade buatsaih ṭha tih niin, Parade Sub- Committee te kutah mawhphurhna dah a ni a. DC Bangla tualah VIP At Home buatsaih ni se, tih a ni bawk.

Republic Day 2026 ah hian Cleanliness Competition Award leh Deputy Commissioner's Award sem a ni dawn a. Kum 2025-2026 chhunga National/State Award- dawng emaw, chawimawi phu mi hming ṭha chawimawi tur emaw an awm chuan a kaihhnawih department te'n dt. 15/1/2026 aia tlai lo ah DC Office- ah hriattirin, Republic Day lawmnaah hian chawimawina hlan ni se, tih a ni a. Sports discipline aṭanga Republic Day 2026 puala inelna (tournament) buatsaih chungchang chu Lawngtlai District Sport Committee Meeting ah rel tura tih a ni.

Republic Day ni-ah hian sawrkar Office, zirna In leh sawrkar quarters-ah te India ram puanzar zar vek tura tih a ni a. Sawrkar hna thawkte chu Republic Day lawmnaah hian tel ngei tura beisei niin, mipuite pawh Republic Day lawmnaa tel vek turin District Bawrhsap chuan a sawm nghal a ni.

Vawiin thutkhawm ah hian Head of Department, LADC aiawh, Political Party aiawh, NGO aiawh leh Kohhran ai awhte an tel a ni.