Vawiin khan National Mental Health Programme (NMHP) bul tumin Lawngtlai CMO Conference Hall-ah rilru hriselna chungchang inzirtirna (outreach awareness on mental health) buatsaih a ni a. Lawngtlai khawpui chhunga tlawmngai pawl hrang hrang - YLA, LWA, MHIP, LUP leh MUP ai awhte an kal khawm.

He hun hi Lawngtlai District Medical Superintendent (DMS) in-charge Dr B. Lalduhawma'n a kaihruai a. Khuallian, Lawngtlai Chief Medical Officer (CMO) Dr Lalthlamuana chuan Lawngtlai District tana hriselna kawnga hma lakna peng hrang hrang an kalpui dan sawiin, District pawhin hriselna lamah hma a sawn chho ve zel a, programme hrang hrang a hlawhtlinna tur chuan tlawmngai pawl leh mipuite thawhpuina a ngai a ni tiin, chumi lama theih tawp chhuaha tan lakpui turin kal khawmte chu a sawm a ni.

He hun hawnna inkhawm tawi buatsaihah Community Nurse Pi Zothansangi Sailo chuan hun buatsaih chhan leh programme kalphung tlangpui a sawi a. NMHP State Nodal Officer (SNO) Dr Robert L. Khawlhring leh Alzheimer's and Related Disorders Society of India - Mizoram chapter (ARDSI-Mz) President Pu Vanneihtluanga te'n rilru hriselna pawimawhzia leh chumi atana khawtlang than harh a tul dan te an sawi a. Lawngtlai District Mental Health Programme (DMHP)-a Medical Officer Dr R. Vanlalrengpuii'n lawm thu sawiin, chawhma hun khar a ni.

Chawhnu lamah technical session hman niin, mi thiam tak takte'n kal khawmte chu thupui hrang hrang an zirtir a. NMHP SNO Dr Robert L. Khawlhring chuan NMHP chungchang leh hma lak dan; ARDSI-Mz President Pu Vanneihtluanga'n Alzheimer's leh a anpui natna dang chungchang; Clinical Psychologist Pi Biakhluzuali Chenkual-in damdawi hman sual vanga harsatna leh a enkawl dan; DMHP Lawngtlai MO Dr R. Vanlalrengpuii'n rilru lama harsatna neite damdawi in behchhana enkawl dan; Clinical Psychologist Pu Jacob Challiandinga'n rilru lama harsatna nei leh buai natna chungchang; Psychiatric Social Worker Pi Vanlalruati'n rilru lama harsatna neite enkawl leh dam chhuah lehna atana vantlangin mawhphurhna an neih chungchang te an zirtir hlawm a. Zawhna leh chhanna leh sawi hona hun hlawk tak hman a ni bawk.

India sawrkar chuan rilru hriselna pawimawhzia hriain kum 1982 khan National Mental Health Programme hi a kalpui tan a. Kum 1996 khan district hrang hrangah din ve tan niin, India ram puma district 241-ah kalpui mek a ni. Kum 1993 khan khawvela mihring awm zawng zawng atanga 6%-7% chuan rilru lama harsatna an nei tih hmuh chhuah a ni a. Kum 2020 hian rilru lama harsatna nei zat hi 15%-ah a kai chho tura chhut a ni.

ARDSI-Mizoram chapter hi mi thahnem ngai thenkhat intel khawmin kum 2015 khan an din a. Alzheimer's leh a anpui natna dang chungchang mipuiin an hriat zau va, a veite enkawlna kawng kawhhmuhtu atana din a ni a. NMHP nen hian Targeted Intervention hnuaiah thawk hovin, Mizorama district hrang hrangah outrech awareness buatsaih hian an zin kual mek a ni.