4122/2024-2025

Lawngtlai, 7th February 2025: Tukin zing dar 8:00 khan Lawngtlai  District Road Safety Committee bultumin 'Road Safety Month 2025 ' hawnna chu Areopagy, Bazar Vêngah neih a ni a. Pu Zoramsiama Hmar, Addl. DC chuan hawnna hun a hmang.

Pu Zoramsiama Hmar chuan kalkhawmte hnena lawmthu sawina a nei hmasa a. Lirthei khalh fimkhur tawk loh avanga  sum leh pai tam tak sen ral a nih bakah  nunna hlu tak chan a ni fo thin chu thil veiawm tak a ni, a ti a. A bik takin zu rui chunga lirthei khalhtute tan chetsualna a hluar bik hle tih tarlangin, zu rim nam chunga lirthei khalh bansan a hun tawh tak zet a ni, a ti. Two wheeler- khalhtute tan 'helmet' khum ngei ngei a pawimawh hle tih sawiin Addl. DC chuan  hei hian vanduai vanga chetsualna a  lo thlenin, thui tak min venghim thin a ni, a ti. Lirthei khalhtuten 'traffic rules leh traffic  sign'  chi hrang hrang an hriat chian a pawimawh hle tih tarlangin, Addl. DC chuan DTO leh MVI   thuchhuakte ngaipawimawh fo thin turin Lirthei khalh thin leh a zuartute a chah.

Addl. DC  chuan mipui, ke a kalte pawhin  mawhphurhna lian tak an nei tih  a tarlang a. Ke a kalna tura siam (footpath) a kal hram hram te,  fimkhur taka kawngpui kân,  kawngpui tichêp zawng a thil dah loh bakah Traffic Police -te thu ngaihchan thiamte chu mipuite tihmakmawh a ni, a ti. Pu Zoramsiama Hmar chuan 'Road Safety Month'  chhungin  hmalakna kawng hrang hrang a awm dawn tih  sawiin, Lirthei khalhtute, a zuartu leh Lawngtlai mipuite theihtawpa sawrkar lo thawhpui  turin a chah nghal a ni.

Tukin inkhawmah hian Pu Zonunchama Ralte, DIPRO, kaihhruainain  'Road Safety Month 2025'  puala thu intiamkamna sawiho a ni a. Pu Zoramsiama Hmar chuan lawmthu  sawina neiin hun a khar.

Road Safety Month-  hi kum tinin thupui thlan bik neia hman thin a ni a. Kumin thupui atan hian ' Fimkhur leh him takin Lirthei khalh thin ang che' tih thlan a ni a. Lawngtlaiah chuan February thla chhung hman a ni ang.