4121/2024-2025

Lunglei, 2025 Ramtuk thla ni 6: India leh Bangladesh ramri chhinchhiahna phun tur leh ramria hna thawh a hmuna enfiahtu, India leh Bangladesh ai awhte telna, Indo-Bangladesh joint boundary inspection team (Indo-Bangla Delegate)-te chu vawiin khan Lunglei District Bawrhsap Pi Navneet Mann chuan Lunglei Circuit House-ah chawchhun eipuiin, inkawm hona buatsaih a ni.

India leh Bangladesh inkara Director-SG Level Joint Boundary Inspection hi February ni 4 - 10, 2025 chhunga kalpui tura ruahman niin, Joint Inspection Team-ah hian India leh Mizoram ai awh mi paruk leh Bangladesh ai awh mi pasarih an tel a. India team hi Survey of India hnuaia West Bengal & Sikkim Geo-spatial Directorate-a Director Pu Uday Shanker Prasad chuan hovin, Bangladesh lam hi Surveyor General of Bangladesh Brigadier General Nur-E-Alam Mohammad Jobayer Sarwar chuan a ho a ni.

Lunglei Bawrhsap Pi Navneet Mann chuan ram pahnih ai awhte chu Lunglei District-ah lo lawmin, inlawmna thilpek atan khumbeu leh khiangkawi ipte a hlan a. Joint inspection neih mek chuan India leh Bangladesh inkarah inrin tawnna leh inpawhna ṭha zawk a thlen ngei a beisei thu sawiin, Bangladesh palaite chu India-a an awm chhungin hun nuam tak hmang turin duhsakna a hlan a ni.

He joint boundary inspection hi November ni 12 - 14, 2024-a Kolkata-a 45th Joint Boundary Conference thu rel bawh zuina a ni a. Ramria hna thawh mek endikna joint boundary inspection hi kum tin kalpui tura ruahman a nih laiin, COVID-19 hri leng avangin kum 2019-2020 aṭang khan inspection hi chhunzawm theih a ni ta lo va. Tun ṭum hi Covid hnua joint inspection kalpui leh hmasak ber a ni.

Tun ṭuma joint inspection-ah hian February ni 4 - 7 chhungin India ram chhungah endikna kalpui tur niin, February ni 7 - 10 chhungin Bangladesh ram chhung lamah endikna hi kalpui chhunzawm a ni ang.

Attachment

  • Loading attachment...