District Task Force Immunisation (DTFI), Lawngtlai District chu vawiin khan Lawngtlai DC Conference Hall-ah SDO (Sadar) Pi Rochuangkimi Khenglawt MCS hovin an thu khawm a. Lawngtlai District-a rotavirus hri danna (vaccine) kalpui tur chungchang an sawi ho.

Lawngtlai DC ai awha meeting kaihruaitu Pi Rochuangkimi Khenglawt chuan Lawngtlai District chhungah hri danna hlau leh la duh lo an tam thin avangin inzirtir zau a tul hle tih a sawi a, district level leh block level-ah a zau thei ang bera puanzar leh mipui zirtir lama tan la turin member-te a chah.

Lawngtlai District Immunisation Officer Dr S. Thaizi chuan rotavirus chungchang leh rotavirus vaccine pawimawhna tlangpui a sawi a. Rotavirus chuan naupangah kawthalo thlenin, thihna tam tak a thlen phah a, ram changkang leh hnufual deuh pawh thlei leh thliar bik a neih loh avangin ‘democratic virus’ tih hial a nih thu sawiin, a danna tur damdawi awm chhun chu tha taka vaccine lak hi a ni rih tih a sawi a. Rotavirus vaccine (RVV) chu Mizorama kalpui vawi khatna tur a nih avangin hlawhtling taka kalpui a nih theih nan thawktute leh mipui tan hona a pawimawh a ni, a ti.

Vawiin thut khawmah hian Lawngtlai District-a hlawhtling taka RVV kalpui a nih theih nana hma lakna tur hrang hrang ruahman a ni a. July ni 1 hian RVV chungchangah media workshop neih tum a ni a. July chawlhkar hnihna chhungin Health Worker leh Anganwadi Worker-te training pek hman vek tum niin, Block Level Task Force te’n mahni block huam chhungah theih tawp lo chhuah se, tih a ni a. RVV hi Mizoram pumah a rual tlanga bul tan tur a nih avangin, State atanga hriattirna dawn veleha eng kim peih fel hman turin ruahmanna siam a ni a. District level-a a hawnna hun hman nan Lawngtlai Electric Veng Anganwadi Centre chu ruat fel nghal a ni bawk.

Rotavirus (RV) vanga kawthalo (diarrhoea) hi khawvel puma hri leng a ni a. Ram tam tak chuan Rotavirus Vaccine (RVV) hi kalpuiin an hlawhtlinpui tawh a. Kawthalo pangngai leh RV vanga kawthalo hi hriat hran a har hle a, damdawi hranpa pawh a la awm bawk si loh avangin RV vaccine lak hi invenna kawng tha ber leh awm chhun a ni rih a, khawvel hriselna ngaihtuahtu pawl “World Health Organisation (WHO)” pawhin Rotavirus Vaccine (RVV) hi khawvel ram tinin kalpui turin kum 2013 khan hriattirna a lo chhuah daih tawh a ni.

India ram bikah chuan naupang damdawi ina enkawl 40% chu RV kawthalo vang niin, kum 2011-2013 chhung khan kum tin naupang kum 5 hnuai lam 78,000 vel zelin an thihpui anga chhut a ni a. Kum 2016 atang khan RVV hi state thenkhatah kalpui ve tan niin, tun thleng hian state 11-in an kalpui tawh a. Mizoram hian kan kalpui ve leh thei a nih chuan state 12-na kan ni dawn a ni.