Vawiin khan Lawngtlai CMO Conference Hall-ah Lawngtlai District chhunga CHC/PHC-a Community Health Officer leh Medical Officer te, Health Supervisor leh Health Worker te tan kum 2018-19 atana RSBY-a tel turte hming lak khawm dan tur inzirtirna hun buatsaih a ni.

He hun hi Lawngtlai CMO Dr Thani Pachuau chuan a kaihruai a. Mizoram State Health Care Society (MSHCS) atanga mi thiam lo kal, OSD Dr C. Lalthanpara leh Dealing Manager Pu Zirsangliana te'n zirtirna hi an pe a ni.

RSBY hi damdawi ina inenkawlna senso sawrkarin a phuhruksak theihna tura ruahmanna niin, beneficiary-te'n he scheme hnuaiah hian kum khat chhungin damdawi ina inenkawl nan Rs 30,000/- thleng an hmang thei a. Kum kal ta 2016-17 chhung khan RSBY kal tlanga damlo inenkawl nana sen ral chu Rs vaibelchhe 12 vel a ni.

Tuna RSBY data hman lai mek hi kum 2011-12-a siam kha a ni a. Kum 2018-19 atang hian a thar hmang thei turin lak khawm hna kalpui tum a  ni. Hemi atan hian Economics & Statistics Department survey BPL list leh Job Card thar ber list hman a ni dawn a. Health worker-te'n anmahni bial theuhvah data khawn khawm hna hi an thawk dawn a ni.

RSBY-a inziak lut tur hian beneficiary-te chuan thla an lak a ngai a. Hemi atang hian Smart Card pek chhuah tur niin, Smart Card tel lo chuan RSBY hamthatna hi hman theih a ni lo. RSBY hi sawrkar damdawi in tawh phawtah chuan hman theih vek a ni a; private damdawi in tam zawkah pawh hman theih a ni bawk. Data thar khawn khawm tur a nih avang hian, Lawngtlai CMO office chuan RSBY-a tel thei leh tel duhte chu BPL data list emaw job card-ah emaw inziak lut vek turin an ngen a ni.