Right to Information (RTI) pawimawhzia inzirtir tharna chawlhkar RTI Week 2019 chu vawiin khan Lawngtlai District tan Lawngtlai Bawrhsap Pi Shashanka Ala, IAS chuan Lawngtlai DC Conference Hall-ah a hawng.

Pi Shashanka Ala chuan mipuite'n an theihna zawn theuhva sawrkar an thawhpui theih nan sawrkar ruahmanna leh a hna thawhte an hriat a pawimawh a, chu chu RTI-in a tum pawh a ni, a ti a. Official-te chu RTI thil tum tihlawhtling tura thawk tur leh mipui lam pawh sawrkar tibuai zawng ni lo va, a tangkai leh hmasawn zawnga RTI chu hmang turin a chah a. Zirlai naupang kal khawmte pawh dilchhutna rilru pu a, sawrkar hna thawh dante hriat tum ve thin turin a chah bawk.

He hun hi Lawngtlai Sub-Divisional Officer (Sadar) Pi Rochuangkimi Khenglawt, MCS chuan kaihruaiin, RTI Week chungchang a sawi fiah a. Lawngtlai DIPRO Pu C. Lalhruaitluanga, MIS chuan RTI Act 2005 leh Mizoram RTI Rules, 2010 chungchang powerpoint presentation hmanga sawi fiahin a zirtir a. Hemi hnu hian RTI kaihhnawih sawi hona leh zawhna leh chhanna hun hlawhtling tak hman chhunzawm a ni a. Zaithiam zai ngaihthlak a ni bawk.

RTI Week hi kum 2011 atang khan kum tin October ni 5-12 chhung hman a ni thin a. Kuminah pawh October ni 5 atanga ni 12 chhung bawk hman leh tur a ni. Vawiina Lawngtlaia a hawnna hunah hian state sawrkar leh LADC hnuaia State Public Information Officers (SPIO) leh State Assistant Public Information Officers (SAPIO) te, tlawmngai pawl hrang hrang ai awhte bakah, Jehova Jire Higher Secondary School leh Vista English School zirtirtute leh zirlaite an kal khawm a ni.