Kum 2005 atanga   India ram a hman tan,  khua leh tuiten an dikna leh chanvo an hmuh theihna tura puitu, sorkar langtlang siamtu, eirukna do leh veng tura siam Right to Information Act (RTI Act)  haptakhat chhung hman tur chu vawiin khan I&PR Auditorium CHANEM Building-ah hawn a ni a, he hun hi Champhai Bawrhsap Dr Naveen Aggarwal, IAS chuan khuallian niin a hmanpui a ni.

RTI Week hi India ram pumah kumtin October Ni 5-12 chhunga hman thin a ni. Khuallian chuan Right to Information Act chu India khua leh tui tawh phawt ten Sawrkarah hriat duh an neihte an zawh theihna tur a duan dan a nih mai bakah zawhna dawngtu Department-te pawhin hunbi tuk chhung ngeia chhanna an pek theihna tura dan siam a ni, a ti a. RTI diltutendilna man bituk chawi ve a ngaih thusawiin, Below Poverty Line chhungkaw tan erawh engmah chawi a ngai lo ani, a ti a, RTI dan hmangin langtlang sawrkar siam leh eirukna leh hlemhletna a ven theih thu a  sawibawk.

Dr Naveen Aggarwal chuan tun dinhmunah Mizoramah RTI Act chu mipuite’n la hmelhriat tha lutuk rih lo mahse nakin lawk kum 10 liam hnuah chuan tangkai taka hman ala nih a rinthu a sawi a. He dan hian Sawrkar department-tehna thawh leh nihphung hrang hrang mipuite hriat ve atana tangkaite puanzar kawngah leh vawnthat chu a thlurbing a ni, a ti. Bawrhsap chuan Champhai District chhunga Department Official-te chu an hnathawh leh kalphungte zau zawk a mipui tehriat a puangzar thin tur leh RTI hmanga zawhna dil an awm changa inhawng taka lo dawng sawng a, an mamawhte lo pe chhuak thin turin a chah nghal a ni.  

Pu Zoremthara Ralte SDO Sadar chuan kal khawmte lawmna thu leh programme hman a nih chhan tlangpui a sawi a, Champhai District chhungah 2018-2019 chhungin RTI zawhna 25 dawn a nih thu tarlangin, RTI Act  chu Sawrkarin dan angin hma a la em tih leh thildik lo awm theite hailanna tur tha tak a ni, a ti. Khua leh tuite dikna leh chanvo humhimsak a nih theihna tura theih tawp chhuah turin Department Official-te a chah a. Sawrkar hnathawkte chu lal hrawt mai lova an thawhsak mipuite hmakhua ngai chunga hnathawk turin a chah a ni.  RTI hapta hawnna neih zawh hian District Information & Public Relations Officer Dr. Lallawmkima kaihhruainain RTI Workshop neih chhunzawm nghal a ni a.  He hunah hian Resource Person tura ruat Pu K. Hrangdawla, District Resource Person hnen atangin RTIchungchang leh chhawr tangkai a nih theih dan turte ngaihthlak a ni a. State dang anga RTI kan la buaipui nasat loh thu leh a nihna ang taka kan la hman tangkai zawh loh thu a sawi bawk.

RTI chungchang sawihona hun neih hnu hian zawhna leh chhanna hun hman nghal niin kalkhawmten an hlawkpui hle a ni. Mizoram Infornmation Commission tarlan dan chuan kum 2006-2007atanga intanin  September Ni 31, 2019 thlengin RTI zawhna 16139 dawn tawh niin, First appeal 177, Second Appeal 73 leh MIC a complaint lut 133 a awm tawh a. Kum 2018-2019 hunchhung khan RTI zawhna 1960, First Appeal 17, Second Appeal 8 leh MIC a Complaint lut 6 a awm anga chhinchhiah a ni.  RTI Week, Mizoram Information Commission, DC Office Champhai leh Information & Public Relations Department, Champhai tangkawp buatsaih hi Champhai DIPRO Dr. Lallawmkima chuan a kaihruai a. Vawiin RTI Week hawnna hunah hian Sorkar Department Official, Zirlaite, NGO hruaitute, khawtlanghruaitute leh Media mite antel a ni.