Vawiin chawhma  khan Sports Minister Pu Robert Romawia Royte kaihruaina hnuaiah State Level Implementation and Monitoring Committee, Mizoram State Games chu an thu khawm a. He hunah hian lungrual takin State Games a inelna tur level chi hrang Pali( 4) chhawpchhuah - Constiuency, Block, District leh State Level zingah Mizoram State Games chu Sports Discipline hrang hranga Constituency aiawh infiammite inelna atan  December 9-14 chhunga buatsaih tura tih a ni.

SLIMC, Mizoram State Games kaihruaitu Sports Minister Pu Robert Romawia Royte chuan, " Mizoramin hun rei tak chhung State Games kan buatsaih loh avanga kan channa hi rinphak bakin a nasa.  National Level atanga International Level  leh abikin Olympic Games-ah te thlenga Medal dawn theihna Sports Discipline tam tak, kan thalai ten an theihnghilh tawh te a awm a. Heng sports dicipline te hi Major Game/discipline rualin kaihthawh kan tum a ni", a ti. Discuss, Shortput, High Jump, Pole Vault leh a dangte chu a mal khai anga tournament siam chhan atan a remchang thin lova. Chuvangin Medal dawn theihna ni mahse, hlamchhiah a hlawh chho zela, thalaite zingah hriat a hlawh ta mang lo tih a sawi a. National Games-ah te Mizoramin thlen san a tum a, Olympic Games-ah te kan thalaite  tam zawka tel tir kan tum a nih si chuan Athletics lamah pawh tan lak zel a ngai a. Hemi kawngah hian kan hma lawka Mizoram State Games chuan rah duhawm tak a chhuah ngei a beiseiawm a ni a ti.

SLIMC, Mizoram State Games thukhawm chuan State Games neihna tur hmunpui ber chu Aizawlah a nghah rualin Sports Discipline thenkhat khelh remchang zawk te chu Kolasib, Kawnpui leh Thenzawlah te khelh a ni dawn a ni. Constituency chhunga lo inpuahchah lawkna buaipui tur  leh a tul anga Constituency continget te puala State Level Organising Committee dawr turin Constituency Level Organising Committee siam a rel a. He Constituency Level Organising Committee-ah hian bial vawngtu, Member of Legislative Assembly(MLA) te chu Chairman atan a ruat nghal a ni. Opening Ceremony, Mizoram State Games chu December 9-ah  huaihawt tura rel a ni a. Opening ceremony neih hma pawh hian, Olympic Heat anga Game tam tak chu thlitfim hman tura ruahmanna siam a ni dawn a. Tun tum Mizoram State Games hi Open Competition a ni dawn a, Junior leh Senior Level hrang hranga then a ni dawn lo a ni. Ruahman lawkna ang chuan Mizoram State Games-ah hian Sport Discipline hrang 30-ah Constituency 40 aiawh infimmite an intihsiak dawn a. Infiammi sang tel tak meuh an intihsiak dawn a, Official pawh mi 500 chuang an awm a ngai dawn a ni.