2480/2024-2025

Dated Lawngtlai, 11th October 2024 : Vawiin chawhma dar 11 khan Deputy Commissioner Office, Lawngtlai bultumin " Observerance of RTI Week 2024"  chu DC Conference Hall- ah neih a ni a. Pu Cheemala Siva Gopal Reddy, IAS, District bawrhsap chuan khuallian niin a hmanpui.

Pu Cheemala Siva Gopal Reddy, IAS, chuan 'RTI Week  2024' hmang tura kalkhawmte hnena lawmthu sawina a nei hmasa a. Kum zabi 21- naah chuan 'information' neih that hi finna, hauhsakna leh thil tihtheihna a ni tih sawiin, information dik leh rintlak ngaihpawimawh a tul hle a ti. A bik takin sawrkar hnathawk tan phei chuan RTI chungchang hi hriatchian em em tur a ni a, inchhiar zau pawh an tihmakmawh a nih thu a sawi. RTI Act -hman a nih hma chuan mipuiten sawrkar atanga an hriat tur pawimawh tak tak - sawrkar kalphung, inrelbawl dan  mipuite hamthatna leh thil dang pawh   hriat a harsa em em thin a, hei hi democracy ramah chuan chin tha  a ni lo tih hriain RTI Act chu kum 2005 khan hman a lo ni ta a ni, a ti.

Mipuiten an dil kher ngai lo a, sawrkar thuneituten 'information' an tarlan leh phochhuah tur tam tak a awm thu sawiin Khuallian chuan department hotute, a bik takin State Public Information Officer (SPIO) leh State Assistant Public Information Officer (SAPIO) te chuan an department in mipui hamthatna emaw mipuite tana an hnathawh, Danin a phut ang angte tar chhuak vek turin a chah a .  RTI Act hnuaia information-  dil a awm reng rengin, hun tiam chhung ngei a chhanna pe thin turin department tin  SPIO leh SAPIO te  a hriattir a ni. RTI chu dik leh langtlang taka sawrkar khalh nghil tura duan a nih ang takin mipuiten an chhawr tangkai thiam a tul hle tih tarlangin Pu Cheemala Siva Gopal Reddy chuan Lawngtlai mipuite tangkai taka RTI  hmang thin  turin sawm nghal bawk.

Vawiin "Observerance of RTI Week 2024" hmanna inkhawm hi Pi Margaret J. Vanlalremmawii, SDO (S) chuan kaihruaiin, sawrkar department hrang hranga SPIO, SAPIO bakah NGO leh VC aiawhte an tel thei a.  Pu Zonunchama Ralte, District Information & Public Relations Officer (DIPRO) chuan RTI Act 2005 chungchang inzirtirna pein; zawhna leh chhanna hun hman nghal a ni a,  Dr. Saithantluangi Zote, SDC chuan lawmthu sawina neiin hun a khar a ni.