Tukin (05.08.2016) zing dar 7 khan Lawngtlai Areopagy hmunah CYLA leh Lawngtlai District Police tang kawp buatsaihin Ruihhlo Do Kumpuan 2016 hawn a ni.

Khuallian Pu VL Hmuaka, LADC CEM chuan Kumpuan hi a hawng a. Ram hmasawnnain hmuh theih lohvah thalaite nun ei chhetu a rawn thlen zel thu sawiin, ?halaite nun tichhe nasa bertu leh sual dang tipunluntu ruihhlo chu inlungrual taka do a tul a ni, a ti a. Ram leh hnam dam nan, ruihhlo ti thinte leh zuar thinte chu a hrem theitute hnena report zel thin turin mipuite a sawm nghal a ni.

Khual zahawm Pu F.Lalsanglura, District SP chuan Lawngtlai District-in hma sawnna kawng a zawh zel a, chu chuan sual a rawn ken tel zel dawn avangin tun hi Kumpuan bawhzui hun tak a ni, a ti a. Ruihhlo chu mi mala do chi a ni lo va, a huhova do chi a ni tiin, ram ropui tak tak tibuai tawhtu ruihhlo lakah chuan kan lo inven loh chuan keini pawh min zuah bik lo vang, a ti a. Ruihhlo dona kawnga anmahni tawiawma nawr kal turin tlawmngai pawl leh mipuite a sawm nghal bawk.

Kumpuan hawnna hun hi CYLA Vice President Pu HC Vanlalruatpuia'n a kaihruai a. Tv H.Vanlalpeka leh Nl Lalremliani te'n zaia mipuite awiin, CYLA Kumpuan Committee Secretary Pu Joseph Lalhmingthanga'n lawm thu sawina hun a hmang bawk.

He hunah hian Lawngtlai Police te, sawrkar official te, YLA leh tlawmngai pawl dang member-te an kal tha hle.