Vawiin khan Sub-Headquarters YMA Conference Hall, Lungleiah Sub Headquarters YMA President Pu Lalnunthara kaihhruaiin Police, Excise & Narcotics Department leh YMA tangkawpten Ruihhlo Do Kickoff Programme an hmang a. Lunglei DC Pu Abhijit Vijay Chaudhari, IAS chu Khuallian a ni.

Pu Abhijit Vijay Chaudhari chuan Excise & Narcotics Department chhut danin kuminah drugs avangin Mizoramah mipa 35 leh hmeichhia 7 an thi tawh a ti a. International Boundary leh Golden Triangle hnaih a awm kan nih avangin Mizoramah drugs tam tak tawlh ruk niin, thalai ten an hman sual phah a ti a. Heng ruihhlo do tur hian Police, Excise & Narcotics Department leh YMA ten thawh hona thuthlung kan ziah hi a hlawhtlin theih nan mi zawng zawng kan tanrual a ngai a ni, a ti.

Lunglei SP Pu Zosangliana pawhin Police, Excise leh YMA te chuan kum 30 chhung ruihhlo an lo do tawh thu a sawi a. International Boundary hrul a awm kan nih avang leh thenawm state atanga ruihhlo tam tak a rawn luh thin avangin thalai tam tak ten nunna an chan phah a ni, a ti a. Kum 2007 leh 2016 chhungin drugs kaihhnawih ah mi 1935 an man thu leh mi 1954 lakah thubuai an siam sak thu a sawi. Sawrkar leh YMA kut a dah mai lovin, ruihhlo do hi mitin te mawhphurhna a ni, a ti.

Excise & Narcotics Department Superintendent Pu Lalhmingthanga chuan ruihhlo tawlh ruk ching te chu Excise & Narcotics Department in Dan hmanga an lo man thin thu a sawi a. Heng kan mi man te hi eng Dan behchhana man nge kan nih tih hriat chian a pawimawh a ni, a ti.