1630/2022-2023

Thlazing ni 17, 2022: Vawiin khan Lawngtlai District Level Committee on Narco Coordination Centre (NCORD), District Level Nasha Mukt Committee leh District Level Task Force on Ruihhlo Do te chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm.

Chairman Pu Amol Srivastava chuan ruihhlo chu mihring nun tichhetu leh khawtlang nun hona boruak tichhetu a nih avangin khua leh tui tawh phawt chuan ṭang ruala do a ṭul a ni, a ti a. Sawrkar department hrang hrang, tlawmngai pawl, kohhran leh khawtlang mipuite’n pheikhai rual taka ruihhlo do kawnga hma lak dan tur ruahman a pawimawh tiin, chuti anga ruahmanna siam tur chuan member kal khawmte chu a sawm a ni.

He hunah hian Lawngtlai District Police, Excise & Narcotics Department, Assistant Drug Inspector leh Central Young Lai Association te hnen aṭangin Lawngtlai District chhunga ruihhlo zawrh leh hman khawloh chungchang leh an hmalakna report ngaihthlak a ni a. Ruihhlo zawrh tihtlem (supply reduction), hman khawloh tihtlem (demand reduction) leh chhiatna a thlen tihtlem (harm reduction) kawnga hma lak dan tur hrang hrang te sawi ho zui a ni.

Ruihhlo dona kawnga kawngkal neia hma lak a nih theih nan department hrang hrangte'n August ni 25 hmain an hma lakna tur 'Action Plan' siamin DC-ah theh lut se, chumi hmang chuan 'District Action Plan' siam a, hma lak zui ni se, tih a ni a. Khaw tinah hma lakna chak zawk a awm theih nan August thla ral hmain District chhung khaw tinah Village Level Task Force on Ruihhlo Do din fel tura hma lak rel a ni a. Sikul leh kohhran hun hmannaah te ruihhlo ṭhat lohzia inzirtirna a tam thei ang ber buatsaih tum niin, department leh tlawmngai pawlte nen ruihhlo hman khawlohna veng tura zing leh uluk zawka khaw dung leh kawmkar te suar tluan tum a ni bawk.

Attachment

  • Loading attachment...