1629/2022-2023

Kolasib dated 16th August 2022: Vawiin tlai khan DC Circuit House, Kolasibah CommonWealth Games 2022-a India Hockey Player Remsiami hmuahna hun buatsaih a ni a. Pu Thomas D.Lalengliana, President, Sub-headquarters YMA, Kolasib chuan hun kaihruaiin tlawmngai pawl hrang hrangten lawmpuina thil pek an hlan a ni.

Kolasib Deputy Commissioner Pu John LT Sanga chuan Remsiami hlawhtlinna avanga zofaten hmingthat an hlawh thin chu ropui a tih thu sawiin a hlawhtlinna phen a tumruhnate, thawhrimna leh taimaknate chu mizo thalaiten entawn nachang an hriat thar a pawimawh thu a sawi a. Thalaite tan infiamna lam ah hmasawnna turin khelmual changtlung tak tak thahnem tak a awm tawh thu leh a tui mi te leh dinchhuah tum mi te tan kawng a inhawn reng thu sawiin hlawhtling tur a bei te tan malsawmna a awm thin thu a sawi. 

Deputy Commissioner chuan Remsiami hlawhtling tura a thil paltlang thenkhatte tarlangin harsatna tam tak a hmachhawn chang pawh a beidawng lova a kal zelna chu tunlai thangtharte tan a entawn tur pawimawh a nih thu a sawi a. Kolasib thalaite tan a ‘Role Model’ ni zel turin a chah bawk a ni. 

Remsiami pawhin he hun ah hian hlawhtlinna chang tur a tanpuina leh tawngtaipuina a dawn thinna ah lawmthu a sawi a. Infiamna kawng ah theihtawp chhuah a hmasawn zel a tum tur thu a sawi bawk a ni. 
Kolasib khaw mipui lirthei nei remchang apiangte chuan Thingdawl atangin Remsiami hi an hmuak a, Kolasib khaw chhung tlankualpuiin DC Circuit House-ah hian a pual a hun hman chhunzawm nghal a ni a. Pu K.Lalthlengliana, District Sports & Youth Services Officer chuan lawmthu sawina hun a hmang bawk a ni.


Attachment

  • Loading attachment...