1628/2022-2023
Lunglei District-a Vaisam, Chithar leh Lungsen khuaa zirtirtu indaihlohna avanga harsatna tawh mek chinfel theih dan tur ngaihtuahin vawiin khan Lunglei DC Conference Hall-ah Lunglei South bialtu MLA Dr K Pachhunga hovin meeting neih a ni.

Meeting-ah hian District administration hotute leh School Education Department hotute bakah Sub Hqrs YMA Lunglei hruaitute an tel a ni.

Meeting-ah hian Vaisam, Chithar leh Lungsen khua a harsatna tawh mek chungchang leh a chingfel tura Department hmalakna neih tawh leh kal mekte report ngaihthlak a ni a. Vaisam leh Chithar khua ah te hian April thla khan School Education Department official-te kalin khawtlang hruaitute leh zirlai nu leh pa te nen inkawmhona leh inrawnna hun an hmang a. Department hotute rawn chunga harsatna chinfel tum anih thu leh hmalakna kalpui nghal niin heng khaw zirtirtu te pawh School Education Department office ah koh khawm an nih thu report a ni.

Lunglei South bialtu MLA Dr K Pachhunga chuan sawrkarin zirna a ngaih pawimawh takzet thu sawiin Mizoram pumah MR teacher leh SEDP teacher thahnem tak lak an nih bakah MLA Fund kaltlanga zirtirtu chhawr an nih thu a sawi a. Vaisam, Chithar leh Lungsen khawtlang te thahnemngaihna chu sawrkarin a hriatthiam pui thu sawiin hemi chungchangah mipui leh NGO-te duhdan mila a theih anga hmalak tum anih thu a sawi a. Zirtirtu nghet transfer chungchang leh zirtirtu posting chungchang te pawh School Education Minister hnenah thlen tawh niin sawrkarin a buaipui mek thu sawiin zirlai te tana tha ber tur an ngaihtuah thu a sawi a ni.

RMSA School, Vaisam, Government Middle School, Vaisam leh Government Middle School, Chithar a zirtirtu indaihlohna leh zirtirtute te sawnchhuah chungchangah khawtlang leh zirlai nu leh pa te chu an lungawi lova. Heng avang hian RMSA School, Vaisam, Government Middle School, Vaisam, leh Government Middle School, Chithar te chu 1st August, 2022 atang khan khawtlang leh zirlai nu leh pa ten kharin zirtirtu school kal tur te pawh dan an ni a. 9th August, 2022 khan School Education Department atangin Pu L. Lalramliana, Deputy District Coordinator, Samagra Shiksha chu Vaisam leh Chithar ah kalin Vaisam All NGO leh Chithar JAC te nen meeting an nei a. Vaisam All NGO chuan August ni 10 atanga ni 31 thleng school hawn lailawk rem tiin, Chithar JAC chuan August ni 10 atanga ni 22 thleng school hawn lailawk rem an ti a ni.

Government Lungsen High School atanga zirtirtu pahnih sawnchhuah (July 2021 leh August 2022-ah) an nih avangin vawiin 16 August 2022 atanga tiam chin awm lovin School hi khar a ni. Tun dinhmunah Lungsen High School-ah hian Headmaster leh teacher nghet pakhat bakah SEDP zirtirtu pathum, MLA Fund a chhawr zirtirtu pakhat leh Hindi teacher pakhat an awm a ni.