289/2022-2023
Ṭau thla ni 26, 2022: Vawiin khan Samagra Shiksha, Lawngtlai District chuan Lawngtlai College Venga Samagra Shiksha New Building-ah a thlawna zirlaibu sem tur leh zirlai tam zualna sikula hman tur sanitary pad vending machine sem chhuahna hun an buatsaih a. Lawngtlai East Bialtu MLA, Agriculture Development Board Vice Chairman Pu H. Biakzaua chu Khuallian a ni.
Khuallian Pu H. Biakzaua chuan Mizoram sawrkarin zirna a ngai pawimawh hle tih sawiin, zirlaite hmakhaw ngaia a thlawna zirlaibu sem leh chawchhun pekte kalpui chhoh zel a nih bakah, infrastructure-ah hmasawnna tam tak hmuh tur a awm tih a sawi a. Lawngtlai District pawh sawrkarin infrastructure lamah tihphuisui belh zelin, building thar din, classroom chei ṭhat leh tunlai thiamna tharlam ber ber hmanga thuam thar ṭhahnem tak a awm a, he'ng hmanrua leh bungruaa hmasawnna rual hian thawktute pawh intuai thar a, ṭan lak zel a pawimawh a ni, a ti.
Pu H. Biakzaua chuan zirna chu hmasawnna inṭanna rahbi pawimawh ber pakhat a nih thu sawiin, zirtirtu leh office-a thawkte'n mahni chanvo ṭheuh hneh taka an thawh chuan ramin hma a sawn chho zel dawn a ni, a ti a. Zirtirtute chu naupang nen ni tina inhmachhawn an nih avangin naupang kaihhruaina kawngah an mawhphurhna leh pawimawhna a sang hle tih sawiin, mahnia a ṭha ber zel zirlaite tan leh zirnain hma a sawn nan hlan turin a chah a ni.
He hun hi Samagra Shiksha, Lawngtlaia District Project Coordinator (DPC) Pi R. Lalnunthari'n kaihruaiin, Pu H. Lalmuanpuia, APO (MIS)-in report a pe a. Khuallianin sanitary pad vending machhine leh incinerator te chu a dawng tur sikul ai awhte kutah hlanin, Deputy DPC Pu S. Lalrinsiama'n lawm thu a sawi a. Hemi hnu hian Khuallian chuan District chhung hmun danga sem tur zirlaibu phur lirthei tlan chhuak tur chu a vai liam nghal a ni.
Free Textbook hi SSA hun lai aṭang tawh khan kum tin sem ṭhin a ni a. Samagra Shiksha a nih hnu pawh hian hri leng karah pawh sem chhunzawm zel niin, kumin pawh hian lehkhabu hi Class-I aṭanga Class-VIII thleng a thlawnin sem a ni leh dawn a ni.
Vawiina zirlaibu sem hi BRC Lawngtlai hnuaia Government, Samagra Shiksha leh Local Body sikul naupangte tana sem a ni a. Primary school zirlai 1,986 leh middle school zirlai 1,275, an zavaiin zirlai 3,261 tan sem chhuah phawt a ni a. BRC Sangau, BRC Bungtlang leh CADC hnuaia sikulah te pawh a tahtawlin sem chhunzawm zel tum a ni.
Middle school aṭanga higher secondary school thlengin, zirlai tam zualna sikulah te kumin aṭang hian sanitary pad vending machine leh incinerator chu hmeichhe naupangte tan sem chhuah ṭan a ni bawk a. Tunah hian a thawh khatna atan 56 dawn niin, kumina dawng bak sikulah pawh kum lo la kal turah a tahtawla pek zel tum a ni bawk.
Attachment
- Loading attachment...
