Vawiin khan Lawngtlai District chhunga chhungkaw tinin eng an neih theihna tur "Saubhagya Scheme" chu Lawngtlai East bialtu MLA Pu H. Zothangliana'n Lawngtlai DC Conference Hall-ah a hawng.

Pu H.Zothangliana chuan he scheme, chhung tinin eng kan neih theihna tur hawn theiha a awm ta chu lawmawm a tih thu a sawi a. Bungtlang 'S'-a Power Sub-Division Office dah a ni te, hun rei tak Sub-Division-a awm thin, Lawngtlai pawh EE thuthmun ni tura upgrade a ni te chu Lawngtlai District tan hmasawnna ropui tak a nih thu a sawi.

Pu H. Zothangliana chuan Mizoramah scheme ropui tak tak chhawp chhuah a ni thin a, he'ng scheme kan neihte tihlawhtling tur hian thawktu department kut ringawta dah lovin tlawmngai pawlte leh khawtlang huapa tan lak ho a pawimawh hle a ni tiin, kawlphetha (power) hi ni tina kan mamawh, eizawnna leh inchhungkhura a tel lova kan khawsak hleihtheih loh a nih avangin, Saubhagya scheme pawh hi hlawhtling ngei se a duh thu a sawi a. Eng khaihlak chang a lo awm pawha a sur a sa hnuaia theih tawpa mipui harsatna sut kian tum thin Power & Electricity Dept-a thawktu zawng zawng chungah lawm thu a sawi nghal bawk.

Hawnna inkhawm hi Lawngtlai Bawrhsap Dr Arun T., IAS chuan kaihruaiin, kal khawmte lawmna thu a sawi a. Lawngtlai Power Division EE Er R. Lalchhanhima chuan PowerPoint Presentation hmangin Saubhagya Scheme a sawi fiah a. LADC-a Executive Member Pu Laltlawmlova Chinzah pawhin thu a sawi bawk.

Saubhagya Scheme hi sawrkar laipui sum hmangin kumin 2018 December ni 31 hmaa thawh zawh tura ruahman a ni a. Hemi hun chhunga thawk zo lote tan March 2019 thleng pawh sei a ni ang a, hetah hi chuan hna thawhna tur sum hi state sawrkarin a tum tawh thung dawn a ni.

Saubhagya Scheme hawnna inkhawmah hian Lawngtlai khawpui chhunga sawrkar department hrang hrang hotute, VC leh tlawmngai pawl hrang hrang ai awhte leh journalist te an tel.