2667/2024-2025

Dated Lawngtlai  23rd October 2024: Vawiin chawhu dar 2 khan District Agricultural  Marketing Committee (DAMC), Lawngtlai  District buatsaihin 'Bana Kaih Policy'  hnuaia Thlai thar hralh 'Sensitization-cum-Consultative Meeting'  chu DC Conference Hall - ah neih a ni a. Pu Zoramsiama Hmar, Additional Deputy Commissioner  chuan he hun hi a kaihruai.

Pu Zoramsiama Hmar chuan Lawngtlai West bialtu MLA, Mizoram Agricultural Marketing Board (MAMB), District Agricultural Marketing Committee (DAMC)  leh line department, Thlai thar Marketing - zirchiang tura  lo kalkhawmte  hnenah lawmthu  sawina a nei hmasa a. Mizoram sawrkarin Flagship Policy ' Bâna Kaih' hnuaiah thlai chingtute hmakhua ngaiin theihtawp a chhuah mek tih sawiin, tun dinhmunah  Sawhthing, Aieng, Hmarcha leh Hmunphiah leina tur, a man (rate) felfai tak a siam tawh thu a sawi a. Lawngtlai District- a thlai chingtute pawhin Bâna Kaih hnuaia hlawkna tak tak an neih theih nan October ni 8 khan District Agricultural Marketing Committee (DAMC) chu din a ni, a ti. Sawrkarin DAMC tih tur (terms of reference) felfai tak a siam tih sawiin,  hemi zul zui a hmalak a nih tur thu a tarlang bawk.

Pu Zoramsiama Hmar chuan 'Sensitization-cum-Consultative Meeting'  chu thil tangkai leh pawimawh tak a nih angin, kalkhawmte chu uluk taka ngaithla a, zirchiang  tur leh Lawngtlai District chhunga Thlai chingtuten hlawk leh man man zawka an thlai thar an hralh theihna tura theihtawp chhuahpui turin a sawm nghal a ni.

Vawiin 'Sensitization-cum-consultative  Meeting' ah hian Pu Lalmalsawma, MAMB Member  chuan 'Agicultural Marketing'  leh DAMC pawimawhna a sawi zau a.  Pu Ronald Lalchhuanawma , MAMB aiawh chuan power point presentation hmangin Thlai thar hralh dan tur kaihhruaina sawi zauin, thlai chingtute atanga a leitute a thlen dan tur te, a lak khawmna hmun atanga hralh dan turte bakah District Agricultural Marketing Committee (DAMC) mawhphurhna hrang hrang leh tihtur hmasate a sawi a, zawhna leh chhanna hun hmang nghal a ni bawk.

He hunah hian Mizoram Agricultural Marketing Board (MAMB) Member,  District Agricultural Marketing Commitee (DAMC) Memeber- te,  Line - Department, Lawngtlai West bialtu MLA leh Lead Bank Manager - te an tel thei a. Pu Zoramsiama Hmar, Additional Deputy Commissioner chuan lawmthu sawina neiin hun a khar.