Vawiin khan Lawngtlai DC bul tuma Nehru Yuva Kendra (NYK) Lawngtlai, MHIP Lawngtlai Electric Veng Branch leh AMKA Lunglei te tang ho buatsaih sikul chawlh hun awl hnawh khah nana naupangte'n Karate an zirna chu District Sports Centre, Electric Veng, Lawngtlaiah a kharna hun hman a ni.
He huna Khuallian, Lawngtlai Bawrhsap Dr Arun T., IAS chuan naupangte'n thiam thil awmze nei an neih theih nana Karate zirna buatsaih a ni chu lawmawm a tih thu sawiin, hma latute inpekna a fak a; hun dangah pawh thil tangkai dang la tihpui leh zel ni se a duh thu a sawi. Naupangte chu kawng eng kimah kaihhruai ngai an nih avangin kawng dik leh tha kawhhmuh zel chu puitlingte mawhphurhna a ni, a ti a. Zuk leh hmuam leh ruihhlo laka an fihlim theih nan te, nun hlim leh hrisel an neih theih nan te naupangte chu kan kaihhruai tur a ni, a ti.
Khual zahawm, Lawngtlai DIPRO Pu C. Lalhruaitluanga MIS pawhin hun awl hnawh khah dan tha neih a pawimawh thu sawiin, hun awla thil tangkai lem lo tih reng ai chuan, thil tangkai zir leh thiam belh chuan kan nunah hlawkna a thlen zawk thin, a ti a. Naupangte hun awl hnawh khah dan tha zawnpui chu nu leh pa leh rual ute mawhphurhna a ni, a ti.
He hun hi MHIP Lawngtlai Electric Veng Branch committee member Pi Zodinpuii Fanchun chuan kaihruaiin, Branch MHIP President Pi Nichiangi'n hunserh a hmang a. Karate Instructress Nl C. Thangrimawii'n report a pek bakah, LWA Lawngtlai Electric Veng Branch leh Lawngtlai Sub-hqtrs MHIP ai awh thu sawi ngaihthlak a ni a. Karate zirlai naupangte'n an thiam an entir bakah, zaithiamte zai ngaihthlak a ni a. Electric Veng VCP Pu K.Laldinmawia'n lawm thu sawiin, hun khar a ni.
He Karate zirna hi December ni 12, 2017 atang khan tan niin, naupangte sikul chawlh hun awl hman that nan leh nun hlim leh hrisel an neih theih nana buatsaih a ni a. Naupang sawmnga chuangin an zir chhuak a ni.
Attachment
- Loading attachment...
