Vawiin hian Thenzawl AH & Vety Farm a AH & Vety Department ten Pony Riding Entertainment an siam thar chu Finance & Planning Minister Pu Lalsawta’n khuallian niin a hawng a; Pu C. Ngunlianchunga, Minister of State, AH & Vety chu khuallian a ni

A hawnna inkhawm tawiah Pu Lalsawta chuan, kan thalai ten intihhlimna hmun leh inlak thawvenna hmun tha an neih hi sawrkar chuan tul a ti em em a, kan thalaite hi keini ai chuan an pawimawh zawk zel a ni, a ti. Ramin nasa zawka hma a sawn theih nan sawrkar kut nilova mimal kut hmanga uar zawka beih tumin hmalak chhoh zel a ni a chumi atana ruahmanna lian tak New Economic Development Policy chu tunah kalpui mek a ni. Mi thenkhat ten NEDP hi pawisa sem programme emaw an ti fo thin a, NEDP in a tum chu pawisa sem nilovin, mi taima hlawhtlin tuma hmala leh hnathawkte an mamawh intawm ngaihtuah saka, mimal neih phak loh hmanrua leh bungraw lian tham lo chhawp sak hi a ni, a ti. Pu Lalsawta chuan, AH & Vety Department zarah hmana kan pi leh pute atanga kan chhawm kan ranvulh, lian hlei thei lo chi ho kha tunah chuan ran lian zawk leh thang duh zawk chiin min thlak sak deuh vek tawh a, AH & Vety Department te an thawk tha thin hle a ni, a ti bawk.

Khualzahawm Pu C. Ngunlianchunga pawhin thu sawiin, Pony Riding Entertainment, Thenzawl Vety Farm-a buatsaih a nih theihna bul chu Planning Minister Pu Lalsawta a nih thu a sawi a. Kan thalaiten intihhlimna leh hun awl hmanna hmun tha leh nuam an neih that tawk loh vanga an harsatna te a hriatpui avanga hetiang ruahmanna hi lo chhuak a nih thu sawiin Pu Lalsawta chungah lawmthu a sawi. Tin, Pu C. Ngunlianchunga hian, tun hnaia sawrkarin vawk note tharchuahna lama hma a lakna hrang hrangte a tarlang a. Kan rama ran vulhtuten  a hralhna an hnawng ngai lova, an mamawh khawp ran note kan neih thin loh zawk avangin kan mamawh zat tharchhuah ngei tumin nasa takin kan bei mek a ni, a ti.

Pony Riding Entertainment hawnna inkhawm hi Dr. Saingura Sailo, Director, AH & Vety chuan kaihruaiin Dr. David Dailo Varte, DD, AH & Vety chuan Technical Report a pe thung.  He Pony Riding Entertainment atan hian Rs. 58 Lakh vel sen niin Manipur atangin Pony sawm (10) an chahchhuak a, Mizoram an rawn thlen hnuin no pahnih an neih belh leh bawk. Manipur atangin trainer ten Thenzawla a enkawltu tura ruatte an rawn train leh vek hnuin tunah hian a duh apiangte tana tlawh/hman theihin hawn a ni ta a ni. A chuan man hi darkar chanve chuan man Rs. 100 ang vela ruahman chhin phawt a ni a, Tuirihiau leh Vantawng Ride duh tan Rs. 600 sen a ngai thung. Tin, he hmunah vek hian AH & Vety dilah Engined boat dah a ni bawk.

Pony hi sakawr, lei atanga teha a hnungzang zawl inches 52 leh a hnuailam ho hi an ni a, inches 52 leh a chunglam chin chu Horse tih an ni thung.

Minister Pu Lalsawta leh Pu C. Ngunlianchunga, Minister of State, AH & Vety te hian vawiin vek hian Thenzawla PIGFED enkawl vawk no tharchhuahna (Vawkpui vulhna) hmun pawh an tlawh nghal a. PIGFED Chairman Dr. Lalnunhlima Ralte leh a thawhpuiten lo dawngsawngin an mamawhte Minister hnenah hian an lo thlen ve nghal bawk a ni.