Vawiin khan Union Minister of Health & Family Welfare, Pu Jagat Prakash Nadda chuan Mizoram State Cancer Institute, Zemabawk-ah Tertiary Care Cancer Centre (TCCC) sak na tur lungphum a phum a. Union Health Minister hian Regional Institute of Paramedical & Nursing Sciences (RIPANS) Boys’ Hostel leh Library cum Examination Hall hawng bawkin, RIPANS Board of Governors’ (BoG) Meeting a kaihruai nghal a ni. He hun hi Health Minister, Pu Lal Thanzara, Lok Sabha MP Pu C.L.Ruala leh Rajya Sabha MP Pu Ronald Sapa Tlau ten an hmanpui a ni.
Union Minister of Health & Family Welfare, Pu Jagat Prakash Nadda chuan TCCC sak na tur lungphum phum a RIPANS building thar te a hawng thei chu lawmawm a tih thu a sawi a. Sawrkar laipuiin India hmarchhak State-te hmasawnna a ngaih pawimawh hle thu sawiin, hemi kawngah hian thahnemngai taka hmalak a nih thu a sawi a. India ramah, a bik takin Mizoram-ah cancer a hluar hle chu pawi a tih thu sawiin ram pum ah kum tin cancer vangin mipui nuai 6-7 an thih thin thu a sawi a. Union Health Minister chuan cancer venna leh cancer vei te a hmalam a hmuhchhuaha, enkawlna tha tak an dawn theih nan sawrkar in theihtawp a chhuah thu sawiin, Ministry of Health & Family Welfare chuan ‘Free Universal Screening for Non-Communicable Diseases’ (a thlawna natna inkaichhawn theihloh chi test-na) hnuaiah hnute cancer, chhul cancer, hrawk cancer, zunthlum, thisen sang leh a dangte kum 30 chin chunglam tan a thlawna test thin a nih thu a sawi a. He scheme hi India ram chhung District 100-ah kalpui a ni a, India hmarchhak ah District 23-ah kalpuiin, hemi zinga District 4 hi Mizoram chhunga mi te an ni, a ti a. Pu J.P.Nadda chuan Mizoram-in cancer enkawlna hmun tha leh hmanrua changkang ber ber te a neih theih nan hma lak zel a tum thu leh tuna Rs.44.27 Crore seng a sak tur, TCCC-ah hian khawl tha leh inenkawlna hmanrua tha zawk te dah a nih tur thu a sawi bawk. Union Minister chuan Mizoram-ah company tha siam, cancer damdawi, implants leh damdawi dangte MRP rate aia 60-90 percent-a tlawm a hralhna AMRIT (Affordable Medicines & Reliable Implants for Treatment) dawr hawn theih thuai a beisei thu a sawi bawk a ni.
He hunah hian Health Minister, Pu Lal Thanzara pawhin thu sawiin khum 100 awmna tur TCCC sak zawh hunah chuan cancer enkawlna tha lehzual pek theih a nih tur thu sawiin khawl tha ‘Linear Accelerator’ pawh order mek a nih thu leh kumin March emaw April thla ah chuan hman tan theih a beisei thu a sawi a. Pu Lal Thanzara chuan Mizoram-a Medical College hmasa ber tur MIMER din tur chungchangah Union Health Minister chu chak taka hmalak pui tura sawmin Mizoram-in MBBS zirna tur seat a neih te nikuma tih tlemsak anih chu tih tamsak leh thuai turin a ngen bawk a ni.
RIPANS building thar hawn zawhah hian RIPANS Board of Governors’ Meeting Union Health & Family Welfare Minister ho hian neih chhunzawm nghal niin hetah hian Mizoram Health Minister, Pu Lal Thanzara chuan Rs.445.8 Crores senga RIPANS zauha tih changtluna khum 100 awmna hospital sakna tur chu a project approve tawh a nih angin a rang thei ang bera hnathawh tan a nih theih nana hmalak pui turin Union Health Minister chu a ngen a ni. BoG Meeting ah hian RIPANS hmasawnna tura hmalakna tur te leh harsatna hrang hrang te an sawi khawm a ni.
He hunah hian Commissioner & Secretary, Government of Mizoram, H&FW Department, Pu Lalrinliana Fanai; Pi Gayatri Mishra, Joint Secretary, Ministry of Health & Family Welfare; Pi Vandana Jain, Joint Secretary, Ministry of Health & Family Welfare; Dr. Ajai Kumar, DDG(M); Pu Mahapatra, Director, I&PR, NEC; Pu Rajeev Kumar, Director, Ministry of Health & Family Welfare leh Pu Pradeep Kumar Thakur, OSD to Union Minister of Health & Family Welfare te leh Mizoram Health & Family Welfare Department hotute an tel a ni.
Tertiary Care Cancer Centre (TCCC) hi Ministry of Health & Family Welfare, Government of India hnuaiah Rs.44.27 Crores senga sak tur a ni a, TCCC-ah hian khum 100 awmna hospital, cancer zai na centre leh ICU changtlung tak awm tura ruahman niin, Radiotherapy Centre changtlung tak, Simulator, Brachytherapy leh LINAC khawl te dah a ni bawk dawn a. 16-Slice CT Scanner, Ultrasound, Bronchoscopy, Digital Mammography leh Flow Cytometer khawl-te dah tura ruahman a ni bawk.
