Headquarters 23 Sector Assam Rifles (Mizoram Range)  bultuma buatsaih National Integration Tour-2018 hmanga Delhi kal tur zirlai naupang 18 leh anmahni hruaitu tur Zirtirtu 2 leh Assam Rifles aiawh 4 te  chu Champhai District Bawrhsap Pu Vanlalngaihsaka IAS chuan Assam Rifles Helipad, Champhai  atangin a vai liam. Tour hian zirlaite hnenah hnam inpumkhatna, India ram chiang zawka hmelhriattir mai bakah zirlai puitu tur hmunhmate fanpui a tum ber a ni.

Hemi puala hun tawi buatsaihah Pu Vanlalngaihsaka chuan Assam Rifles te’n zirlai naupangte tana Delhi tlawh theihna hun tha an buatsaih thei chu fakawm a tih thu a sawi a. Hetiang ang hun hi thil thleng zen zen lo a ni a, zirlaite tan chuan hun duhawm leh vanneihna a ni, a ti a. National Integration Tour kal tur zirlai naupangte chu hun remchang an dawn chu hmang tangkaia, zirlai puitu a tana hmang thiam thei turin a chah a. Mizo hnam hmel lanna tur an nih angin an kalna apiangah inthununna tha tak nei tura chahin ei leh in chena fimkhur a tul thu a sawi a. Thiamna leh thil tangkai tam tak rawn zir hawa, hmang tangkai turin a fuih a. Zirlai naupangte chu  Tour hlawhtling tak neia dam taka lo let leh turin duhsakna a hlan nghal bawk a ni.

Tour hi January ni 21 atanga February ni 5 thleng awh tur a ni a. Hemi hun chhung hian Delhi leh a chhehvela hmun pawimawh leh zirlaipui thei turte fan pui an ni dawn a ni. Heng bakah hian Republic Day Parade a hmunah an thlir dawn a. India ram rorelnaa mi pawimawh tak tak heng; India President, Minister of State for Home leh Union Sports Minister-te pawh hmuin kawmna hun an nei dawn bawk a ni.

National Integration Tour-2018 kal tur te hi Champhai khawpui chhunga Sikul hrang hrang atanga thlan chhuah zirlai naupang 18; Mipa 9 leh  Hmeichhia 9 an ni a. An mahni hruai tur hian zirtirtu 2 leh Assam Rifles atangin mi 4 an tel dawn bawk a ni. Tour team-te hian tukin zing khan Delhi lam pan turin Champhai an chhuahsan a ni.

Tour kal turte vai liamna hunah hian Pu Brijendra Kumar Yadav, SP Champhai; Col Brijendra Singh, Commandant 10 Assam Rifles; Zirlai pawl hruaitu leh zirlai chhungte an tel a ni.

 

Attachment

  • Loading attachment...