Vawiin khan National Livestock Mission (NLM) hma lakna hnuaiah Lawngtlai AH & Vety Complex-a Farmers’ Training Hall-ah mihring ran vulhte rulhut laka ven pawimawhzia inzirtirna ni “state deworming day 2017” hman a ni a. LADC Chief Executive Member Pu T. Zakunga’n a hmanpui.

Pu T. Zakunga chuan kut hna thawktute chu ram innghahna an nih thu sawiin, an hnaa an rinawm phawt chuan ramin hma a sawn zel dawn a ni, a ti a. Ran vulh chu ei zawnna tlak leh mahni dinhmun sawh nghehna atana thlanawm ber pawl a nih thu sawiin, thil dang ang bawkin ran vulhah pawh hlawhtling tur chuan beih hram hram peih a pawimawh a ni, a ti. Ran vulh hriselna leh mihring hriselna chu a inzawm tlat tih sawiin, hlawk taka ran vulh tur leh thar chhuak turin ran hrisel neih a ngai a, chumi tur chuan uluk taka ran vulhte enkawl a, mi thiamte pawh rawn fo thin turin ran vulhtu kal khawmte chu a chah a. Thu a sawi zawhin, vawk vulhtute hnenah rulhut hlo a sem nghal bawk.

Vawiina rulhut dona ni hi Lawngtlai DVO Dr B. Zonghinga’n a kaihruai a. State deworming day hman a nih chhan leh a thil tumte sawi fiahin, mihringin natna kan kai theih zaa 70 hi chu kan ran vulhte atanga kan kai a nih avangin, kan ran vulhte hriselna hi kan ngaihthah a thiang lo a ni, a ti.

State deworming day hi National Livestock Mission (NLM) hma lakna hnuaia hman a ni a. Mihring ran vulhte rulhut laka an fihlim theih nana ran vulhtute zirtir tharna ni atan ruahman a ni. Vawiina Lawngtlaia he ni hmannaah hian Lawngtlai khawpui chhunga vawk vulhtu thahnem tak kal khawmin, vawk rulhut hlo chu a thlawna sem a nih bakah, a hman dan tur leh tih zui zel dan turte inzirtir nghal a ni bawk.