Vawiin khan Lawngtlai DC Conference Hall-ah Lawngtlai District Swachh Bharat Mission (Gramin) chu an Chairman, Bawrhsap Dr Arun T., IAS hovin an thu khawm a. Lawngtlai District-a Swachh Bharat Kosh kalpui dan tur an sawi ho.

Lawngtlai Bawrhsap chuan Lawngtlai District chu ODF-a puang tura hma lak mek a nih dan tar langin, Swachh Bharat Mission (Gramin & Urban) leh MGNREGS convergence hmanga ek in sak chhoh mek a nih thu leh November thla hi chuan sak zawh hman vek beisei a nih thu a sawi a. Chumi hunah chuan Lawngtlai chu ODF District a nih ve theih tawh tur thu sawiin, hemi kawngah hian tlawmngai pawl leh mipuite thawhpuina an mamawh tih a sawi a. ODF nih ngawt pawh chu a tawpna tur ni lovin, bul tanna tur chauh a ni a; ODF+ ni tura hma la lak chhoh leh zel tur a nih thu a sawi bawk.

He meeting-ah hian Member Secretary, PHE Sr Executive Engineer Er Laltlanchhunga bakah, PHE officer leh staff te, sawrkar department hrang hrang official leh tlawmngai pawl ai awhte an tel a. Fel fai zawka hna kalpui a nih theih nan Swachh Bharat Kosh hnuaia ek in thawm that ngai thawm that hna chu Swachh Bharat Mission (Gramin) hnuaia ek in sak thar hna zawh hnu law lawah thawh ni se, an ti.

Kum 2012 khan PHE Department chuan Lawngtlai District-a ek in nei lo chhungkua zawng chhuakin, chhungkaw 9542 chu ek in nei lo an ni tih hmuh chhuah a ni a. Hemi zulzui hian Swachh Bharat Mission hnuaia ek in thar sakna tur sum chu tihchhuah niin, ek in sak hna hi kalpui chhoh mek a ni a. Kum 2016 khan sawrkar laipui chuan ek in phui tha lo (insanitary toilet) zawng chhuak a, ek in phui tha leh him (sanitary toilet)-a let vek turin thu a chhuah leh a. Heti ang ek in nei hi Lawngtlai District-ah chhungkaw 12072 hmuh chhuah niin, Swachh Bharat Kosh hnuaiah ek in thawm that hna hi thawh tur a ni.