2244/2026-2027

Lawngtlai, 17th September 2026: Vawiin khan DC Office, Urban Development & Poverty Alleviation (UD&PA) leh Public Health Engineering Department (PHED) tangkawp buatsaihin Swachhata hi Seva Campaign - hawnna DC Office - tualzawlah neih a ni a. Pu H. Zonunmawia, PD(DRDO) chuan Khuallian nia hmanpuiin hawnna a nei a, Pu Collin Hlychho, District Project Officer, (UD&PA) chuan hun a kaihruai.

Pu H.Zonunmawia chuan kalkhawmte chibai bukin Lawngtlai District- in faina leh thianghlimna kawnga rahbi thar kai tura lawm taka 'Swachhata hi Seva Campaign ' a hawn thu a sawi a. Khawpui mawi leh chhenfakawm zawk siam turin faina leh thianghlimna kawngah theihtawp chhuah a hun tawh tak zet a ti . A bik takin bawlhlawh sawngbawl kawngah felfai leh mumal zawka bawlhlawh thliarhran bakah a paihna tur hmuna paih thin tura hmalak a tul hle a ni, a ti. Faina leh thianghlimna kawngah sawrkarin amah maiin hma a la thei lo a, khawtlang hruaitute leh mipuite nen thawhhona tha tak a awm a tul a, faina kawnga ke pen ho thiam a pawimawh hle a ti. PD chuan Zirlaite chu faina kawnga bul tantu leh midangte zirtir chhawngtu pawimawh tak an ni tih inhriaa, theihtawp chhuaha tan la thar turin a fuih a. Faina leh thianghlimna kawngah Lawngtlai District- dinhmun a chhuanawm loh fo tih sawiin, Swachhata hi Seva Campaign - chuan rah tha zawk a thlen ngei a beisei tih sawiin PD chuan Lawngtlai District- mipuite theihtawp chhuahpui turin a sawm nghal bawk.

Pu Collin Hlychho kaihhruaiin Swachhata Pledge - sawihona neih a ni a. Bawlhhlawh chi lia thliar hran dan inzirtirna hun hman nghal niin, School tin aiawh ten a taka bawlhhlawh thliar hran dan zirna hun an nei a ni. Vawiin hun hmannaah hian Lawngtlai khawpui chhunga Head of Department leh School - 8 atangin Zirlai leh Zirtirtu thahnem tak an tel thei a, zirlaite hian khawpui chhung hmun hrang hrangah bawlhlawh chhar faina hun an hmang nghal a ni.

Swachhata Hi Seva  Campaign' hi September ni 17 atanga -  October ni 2,  2026 chhunga kalpui a ni ang a. Hemi hun chhung hian  Promotion of RRR, Wall Painting/ Thematic Art Competitions, Transformation of Cleanliness Target Units & Clean Public Places, Jan Bhaagidari Advocay Drive (Public Participation, Awareness Campaign), Sports for Swachhata & Post- Event Cleanliness, Swachhata Se Samriddhi (Prosperity through Cleanliness), Safai Mitra Suraksha Seva Evam Samman Shivir (Sensitization Workers Safety, Service and Honour Camp),  Ek Din, Ek Ghanta, Ek Saath (One day, One Hour, Together) leh Swachhata Bharat Diwas (Clean India Day) te kalpui a ni ang.Mizoram leh LADC hnuaia  sawrkar department hrang hrang; Zirna In, NGOs, Village leh Commercial Vehicle Association, Lawngtlai te chuan anmahni huang chhungah theuh faina beihpui hi an kalpui dawn a ni.