1862/2024-2025

Lawngtlai the 2nd September 2024 : Vawiin chawhma dar 11 khan India rama Faina beihpui thlakna lian ber ' Swachhata Hi Seva Campaign' September ni 14 atanga October ni 1 chhung awh tur kalpui dan tur sawihona DC Mini Conference Hall- ah neih a ni a. Pu Cheemala Siva Gopal Reddy (IAS) District bawrhsap leh Chairman, Lawngtlai Town Sanitation Task Force nibawk chuan thutkhawm hi a kaihruai.

Pu Cheemala Siva Gopal Reddy (IAS) chuan kalkhawmte hnena lawmthu sawina neiin, Lawngtlai khawpui Fai leh thianghlim zawk siam turin mitinin mawhphurhna lian tak na nei theuh a ni, a ti a. Faina beihpui thlak hi sawrkar kuta dah mai chi a ni lo tiin, NGO hrang hrang, Kohhran leh khawtlang mipuite thawhhona leh hmlakna tur a ni, a ti. Lawngtlai khawpuiah faina ngaihthah avangin Dengue, Malaria, kawthalo leh natna hrang hrang hluar hle tih sawiin, Faina leh thianghlimna lama hmasawnna a awm chuan heng natna te hi pumpelh theih anih dawn thu a tarlang. Chenna in leh a vel tihfaiah faina hi a tawp mai lo a, khawtlang fai leh chhenfakawm siam hi a tum ber a ni, a ti.

Bawrhsap chuan Lawngtlai khawpui a lo fai leh thianghlim zawk nan bawlhhlawh paih kawngah fimkhur a tul hle a ti a. Mahni duh duhna hmuna bawlhhlawh paih an awm thin chu veiawm a tih thu sawiin, sawrkarin hmun a siam ah chauh bawlhhlawh paih thin turin mipuite a ngen a. Swachhata Hi Seva Campaign - kalpui chhung ringawta duh tawk mai lo tur a ngenin, faina leh thianghlimna chu nitin atak a nunpui zawk turin a chah a. Tun dinhmunah Lawngtlai khawpui chungah hmalak ngaihzualna Cleanliness Target -100 a awm mek tih tarlangin, heng hmunte hi a rang thei ang bera tihfai a tul hle tiin, theihtawp chhuahpui turin kalkhawmte a sawm.

Pu Cheemala Siva Gopal Reddy chuan September ni 14 atanga October ni 1 chhunga kalpui tur 'Swachhata Hi Seva Campaign' hnuaia sawrkar department leh tlawmngai pawl hrang hrangten hmalakna an neih ang angah thlak leh video document fel fai tak siam a, DPO, UD&PA hnena thehlut tura chahin; heng hmalakna hrang hrangte hi sawrkarlaipui hnenah thlen leh tur a ni, a ti. Faina leh thianghlimna kawngah Lawngtlai District mipuiten theihtawp kan chhuah chuan lawmman tha tak kan dawng thei dawn tih tarlangin Pu Cheemala Siva Gopal Reddy chuan sawrkar department zawng zawng leh NGO hrang hrang bakah Lawngtlai mipuite Faina beihpuithlak kawngah thahnem ngai tak a thawhpui tura sawmin, thuthar thehdarhtute pawh faina inzirtirna tamzawk ziak a, mipuite hena puangzar thin turin a sawm bawk.

'Swachhata Hi Seva  Campaign' hi hlawm lian  tak pathum - Swachhata Ki Bhagidaari (Public Participation, Awareness & Advocacy), Sampoorna Swachhata & Swachhata Lakshit Ekayi (Complete Cleanliness including Cleanliness Target) leh Safai Mitra Suraksha Shivir (Sensitization Workshop & Health Check up) hmangin September ni 14 atanga October ni 1 chhung kalpui tura tih a ni a. Hemi hun chhung hian Mizoram leh LADC hnuaia  sawrkar department hrang hrang; NGO- CYLA, LWA, LUP, MUP, MHIP, LDVCPA bakah Kohhran, Sumo, Taxi, Auto Rickshaw, Pick-up, Truck leh Two wheeler Drivers' Association, Lawngtlai te chuan anmahni huang chhungah theuh faina beihpui hi an kalpui dawn a ni.