Nimin khan Lawngtlai CMO Conference Hall-ah Lawngtlai District TB Centre huaihawtin ngawr (tuberculosis) natna chungchang Media Workshop buatsaih a ni.
He hun hmanpuitu Lawngtlai District Chief Medical Officer (CMO) Dr Lalthlamuana chuan nun hlim nan leh kawng tinrenga hma sawn turin hrisel a pawimawh tih sawiin, Lawngtlai District-a TB natna tibo tura hma lakna kalpui mek chu a hlawhtlin ngei theih nan District mipuite'n mahni zawn theuhvah tan kan lak a tul a ti a, mipui zirtir kawnga thawhpui turin chanchin theh darhtute chu a sawm nghal.
District TB Officer Dr S. Thaizi chuan TB natna chu inkai chhawn awlsam tak ni mah se, a veite'n a dan dik taka enkawlna an dawn chuan natna tihdam awlsam tak a ni, a ti a. He natna vei nia inringhlelte chu inentir vat a pawimawh tih sawiin, a hrik hmuh chhuah hma a, enkawlna tha taka lak chuan natna hlauhawm a ni lo, a ti. Dr S. Thaizi chuan kum 2025-ah chuan TB natna chu India ram atanga um bo a nih theih nan sawrkarin hma a la mek tih sawiin, hemi a hlawhtlin theih nan mipuite'n theih tawpa sawrkar hma lakna an tawiawm a pawimawh a ni, a ti bawk.
Lawngtlai District-a TB vei hmuh chhuah leh enkawl kawngah District TB Center hian nasa takin hma a la chho va. Lawngtlai District chhungah kumin January atanga August ni 13 thlengin TB natna vei, khak atanga hmuh chhuah 70 an awm tawh a. Kum 2018 report-ah TB leh HIV vei kawp mi 5 hmuh chhuah an ni a, TB vei nunna chan 2 an awm. TB vanga enkawl laite chu, tha taka enkawlna an dawn tluan theih chuan ₹ 750 pek an ni thin a; tin, an inenkawl chhungin taksa tana chaw tha an ei theih nan thla tin ₹ 500 pek thin an ni bawk.
Attachment
- Loading attachment...
