India Independence Day vawi 73-na chu India rampum rualin Mizoramah pawh a lawmna ropui ber Aizawlah vawiin khan A.R. Ground ah neih a ni a; Chief Minister Pu Zoramthanga chuan Hnam Puanzar a pawhparh hnuah Parade Contingent ten hnam puanzar chibai an buk chu a chhanglet a ni.

Chief Minister chuan Mizoram mipuite chu chibai bukin, thang leh tharten zalenna sualtute inpekna leh an tawrhna te an zah thiam a, an inpumpekna leh mahni hmasial lova an inhlan avanga zalenna chang a, hmalam hun thlamuang takin suangtuah thei an ni tih theihnghilh lo turin a chah a. Vawiin Independence thuchah a sawiah hian Chief Minister chuan Mizo pasaltha India zalenna sual hun laia Indian National Army a tel, thla hmasa mai a mualliam ta Pu Darthawma, Lunglei khua chu zahna chibai bukin, zalenna atana a inpekna chu Mizoramin a theihnghilh loh tur thu a sawi.

Chief Minister chuan Independence Day puala thuchah a sawiah hian Mizoram sawrkar hmalakna hrang hrang a hnuai a mi ang hian a tarlang a ni:

1) SEDP chu hmasawnna huapzo leh ngelnghet, a chhunga mipuite dinhmun tihmasawn tur leh ei leh bar kawnga intodelhna tur, khawtlang nun tihmasawn a, mipuite hlimna leh thlamuanna thlentu tur a ni a. SEDP chuan Gross State Domestic Product (GSDP) sang zawk thlen a, mipuite sum dehchhuah tihpun a tum bakah eizawnna kawng hawn belhin hmasawnna ngelnghet leh tluantling a thlen thei dawn a. Hemi atan hian Minister-te enkawlna hnuaiah Board hrang hrang 14 din niin heng Board hrang hrangte hian chanpual insemin chak takin hma an la dawn a ni.

Raw chin leh a tihpuitlin chu sawrkar flagship programme SEDP hnuaia programme pawimawh ber pakhat a ni a, hemi atan hian raw chi hnih - Brandisii leh Latifloras te chu chin a tih pun theihin a awm tawh a. Heng raw lian pui pui pahnih, teh kuala inches 15-20 inkar leh feet 50 chuanga sangte hi tissue culture in a chi siam a kui tiah mek an ni a, heng hi Mizoram chhunga chin remchanna hmun apiangah a tam thei ang bera sawrkarin chin a, sawngbawl a thildang siamchhuah (process) nan hman tum niin, chuta tan chuan Bamboo link road te, a chin pun na leh a chi man tur te nen sawrkarin Central Sawrkar atangin pawisa a tam thei ang ber lakchhuah a tum a ni a. A tul ang zelin state budget SEDP atang pawhin remruatna siam a ni bawk ang.

2) District thar pathum siam chungchangah Chief Minister chuan ramchhung inrelbawlna a awlsam zawk nan leh mipuite tan awlsam zawkna a nih theih nan Saitual, Khawzawl leh Hnahthial chu district ah siam thar an nih thu leh, district tharte hlawhtling taka kalpui a nih theihna atana sum sen tur pawh sawrkarin a ruahman fel sa vek tawh thu te, district ramri leh district thara tel tur khua te pawh August ni 9 khan siamfel vek a nih thu a sawi a. Deputy Commissioner Office leh Superintendent of Police Office din turin engkim peihfel a ni tawh a, sawrkar Department hrang hrangte pawh District thara an inbun felna tur ruahmanna siam tura hriattir an nih thu a sawi.

3)   Kan Police Department te remhriatna leh thawhrimna zarah kum kalta engemaw chen kha chu dan leh thupek bawhchhiatna lian tham a thleng lo a, hei  hi thil chhinchhiahtlak tak a ni. Khuarel chhiatna leh rikrum thila rang taka chet lakna tur ‘Emergency Response & Support system’ (ERSS) project ruahman niin niminpiah mai August ni 13, 2019 khan hman tan a ni a.

Mizoram Forensic Science Laboratory (MFSL) hi sawrkar laipuiin Nirbhaya Fund Scheme kalpui tura Forensic laboratory 13 a thlanchhuah te zing ami a ni a. Hei hi India ram chhunga forensic laboratory zawng zawng zinga case pending nei lova chingfel nghal zel thin awmchhun a nih bakah  India ram forensic laboratory te zinga online hmanga kuthnu chhuina case update reng thei awm chhun a ni bawk.

4)        Tan in (prison) inenkawlna hi sawrkarin a ngai pawimawh em em a, lung in tang te hmakhua leh hamthatna a ngaihtuah reng thin a ni. Hmeichhe pual bik jail pawh tunhnai maiah khan sak zawh niin luah fel tawh a ni a, Central Jail, Aizawl ah Auditorium sak mek niin Centrail Jail panna kawng chei that hna pawh thawh zawh tep a ni a.

5)        NITI Aayog in hriselna lama hmasawnna tehna kumin June thla a a tihchhuahah Mizoram chu India rama state tenau te zingah pakhatna niin India ram pum huapin pahnihna a ni a, hriselna kawngah hma kan sawn zel theih nan kawng hrang hrangin ruahmanna kalpui mek a ni.

6)       Kum 2018-2019 chhungin High School Science zirtirtu 66 leh Mathematics zirtirtu 48 lak thar an ni a, Private Middle School 7, High School 25  leh Higher Secondary School 43 chu Adhoc Lumpsum-GIA dinhmunah hlankai an ni bawk. Hemi hun chhung vek hian RMSA hnuaiah school 89 and  staff quarters 202 sak zawh a ni bawk. SSA hnuaiah kum kalta chhungin zirlai naupang 1,07,165 a thlawnin zirlaibu pek an ni a, zirlai naupang 98,086 school uniform a thlawnin pek an ni bawk.

7)       Kuthnathawktute thlai tharchhuah hralhna tur bazar changtlung tak siam hi kan thiltum pawimawh tak pakhat a ni a. Commerce & Industries department hnuaia Commerce Wing chuan kan bazar neihte thawm that bakah bazar thar sak hna te a thawk mek a, NEC hnuaiah cheng nuai 1300 in Dawrpui, Aizawla New Market building thar sak zawh tawh a ni a, NEC hnuaiah tho Mission Veng Bazar Complex sak zawh fel a ni a.

Mizoram sawrkar chuan Indo-Myanmar insumdawntawnna a ngaipawimawh hle a, Border Haat sakna tur hmun li - Hnahlan, Zote, Vaphai (Saikhumphai) leh Sangau (Pangkhua)-ahte hmunhma thlan fel a ni tawh a, hemi atan hian ram pahnih ten Memorandum of Understanding (MoU) leh Mode of Operation (MoO) an ziak fel tawh a ni. Mizoram leh South-East Asia ram te insumdawn tawnna kawng awmchhun Zokhawthar Land Custom Station (LCS) pawh Land Custom Station puitling ni tura ruahmanna siam mek a ni. Bangladesh nen a kan insumdawntawnna atana pawimawh tak Tlabung Trade Facilitation Centre chu sak zawh tawh a ni a.

8)       Kawlphetha siamchhuah kawngah nasa takin hma kan sawn a, 20MW Vankal Solar Park leh 2MW Tlungvel Solar Park te hi sawrkar kum tharah zawh fel hman beisei a ni a, Aizawl khaw chhunga 33/11kV Sub-Station te tih len hna kalpui mek a ni a, 132kV Sub-Station Zuangtui tih len hna pawh 25MVA transformer pahnih cheng nuai 703.42 senga bunin zawh fel a ni tawh bawk a ni.

9)       Aizawl khawpuia traffic tawt lutuk tih ziaawm nan ruahmanna thar PAHOSS (Parking House Support Scheme) chu tunhnai khan sawrkar-in a takin a kalpui a. He ruahmanna hnuaiah hian Aizawl khawpuia traffic tawt tih ziaawm nan sawrkar chuan mimal thlanchhuahte hnenah pawisa pe in anni hian lirthei dahna tur ‘parking lot’ an sa dawn a ni. He ruahmanna atana hman tur hian cheng vaibelchhe 60 dah a ni a, a tul ang zelin pawisa te hi dah belh leh a ni ang.

Aizawl khawpui chu kumin October ni 2-ah “Plastic Free City” a nih theih nan hmalak mek a ni a. Aizawl Municipal Corporation (AMC) chuan tun hnai khan “AMC Solid Waste Management Bye-Laws, 2019” chu hman turin a pawm a. Hei bakah hian AMC hian AMRUT ruahmanna hnuaiah project hrang hrang a kalpui mek a, Municipal Area huam chhungah hian Major Project 15 atan DPR a siam bawk.

10)      Mi tinin tui thianghlim in tur leh inthiarna thianghlim kan neih theih nan sawrkar department leh khawtlang hruaituten hma an la nasa hle. Nikum khan Mizoram chu Open Defecation Free (ODF) ah puan a ni a, ODF-a puan State 13-na a ni hial a ni. Tunah hian India rama State fai ber ni turin hmalak mek a ni. Mizorama khaw awm zawng zawnga tui thianghlim in tur pe tur hian department chuan hma la zel a ni. PHED hian sawrkar kum kalta chhung khan House Water Connections 4,235 a pe chhuak mek a, cheng nuai 4,320 la lut tura tuk an nih laiin cheng nuai 4,479 lai a la lut a ni.

11)     Disaster Management and Rehabilitation Department chuan chhanchhuah hna leh chhawmdawl hna a thawk thin a, hei bakah hian mihringin kan tawh theih chhiatna chi hrang hrang laka kan him theih nan hma a la thin a ni. State, District leh khawtlang huapin Mock Drill a buatsaih thin a, heng te hi chhiatrupna a thlen hun pawh a mipuiten insaseng dan emaw, inven dan emaw kan lo thiam theih nan a ni. NH-54 siam thatna tur leh Hunthar Venga lei tlahniam siam thatna tur ruahmanna DPR chu Ministry of Home Affairs in a pawm tawh a, a senso tur cheng vaibelchhe 15 chu tun atanga reilote ah min rawn pek beisei a ni.

12)     Loneitute leh kuthnathawktute tharchhuah a pun theih nan kawng hrang hrangin hmalak a ni a. Sub-Mission on Agriculture Mechanisation (SMAM) hnuaiah loneituten an hnathawhna atana an hman tur khawl leh bungraw dangte man tlawm zawkin pek an ni a, tractor 200 chuang leh power tiller 1500 chuang pek chhuah tawh a ni.

13)      Horticulture Department chuan cluster mode a thlai ching turin hma a la a a bik takin off-season tomato leh zikhlum ah hlawhtlinna hmuh chhoh mek zel a ni a. MIDH hnuaiah off- season zikhlum ching tur hian hma lak  a ni a, zikhlum quintal 6080 tharchhuah niin cheng nuai 302.00 hmuhchhuah a ni. Hei bakah hian off-season tomato hi quintal 2944 tharchhuah a ni a, cheng nuai 117.00 hmuhchhuah a ni bawk.

14)    Tunah hian khaw 209 a ram acre 5716 a zau ah Silkworm food plantation kalpui mek niin a chingtu mi 5651 an awm mek a ni. Kumin kum tir a Union minister for Textiles-in ‘De¬velopment of Eri Sericulture for the Upliftment of Aspirational District’  pali a hawn zingah Mamit district tel ve in Mamit district a chhungkaw 500 in an chhawr tangkai thei dawn a ni.

15)      Animal  Husbandry & Veterinary sector lamah Government of India chuan Hmarchhak state-a vawk vulh (piggery industry) thar thawh lehna turin ‘Import of Pigs from UK for all N.E States’ programme a kalpui mek a, Mizoram sawrkar chu nodal department atan ruat nghe nghe a ni.

16)   Zin mite tan Mizoram hi hmun nuam taka siam tum zel a ni a, Sawrkar pawhin hma nasa takin a la a, chung zingah chuan India hmarchhaka a hmasa ber atan  Swadesh Darshan Scheme hnuaia Thenzawl Golf Course leh Resort sak te a tel a ni.  Thenzawl Golf Course hi 18-hole course niin, eco-log huts 30 sak a ni bawk a ni.

17)   Food, Civil Supplies & Consumer Affairs Department chuan furpui chhunga khaw kilkhawr leh kalpawh harsa zual ten buhfai an tlakchham loh nan supply centre hrang hrang  61-ah kumin November thleng tla tur buhfai a chhek khawl tawh a. Ration card digitization pawh zawhfel tawh ni niin hei hian ration card diklo hmuhchhuah kawngah nasa takin sawrkar a pui dawn a ni.

18)  NEC hnuaiah cheng vaibelchhe 6.19 sengin Vaivakawnah Cultural Centre-cum- Auditorium sak mek a ni a,  September tha hian zawhfel hman beisei a ni a. Special Priority Assistance hnuaiah Bawngkawn Chhim veng ah Cultural Centre sak mek niin kumin chhunga zawhfel hman tum a ni.

19)   NABARD RIDF Scheme hnuaiah Land Resources, Soil & Water Conservation Department chuan cheng nuai 311.21 sengin hectare 370 a zau Rubber Plantation a siam a. State Priority Project hnuaiah cheng nuai 515.39 sengin Retaining wall, Rigid Pavement engemawzat a siam a, cheng nuai 494.01 sengin kilometre 60 a thui Rubber Plantation Link Road 6 a siam bawk a ni.

20)   Department of Taxation chuan Kum 2018-2019 chhungin Revenue cheng nuai 57,888.31 an la lut a, an target cheng nuai 37,000 an khum hneh hle a ni. Value Added Tax (VAT) lak thin chu Goods & Services Tax (GST) a thlak a ni a. The Mizoram Goods & Services Tax Act & Rules, 2017 chu khawng taka kalpui niin nikum a revenue an hmuh aia tam kumin hian hmuh beisei a ni.

21) Kum 2018-2019 chhungin kilometre 126.84 a thui kawng laih thar a ni a, kilometre 326.106 a thui kawng chhuat Black-topping zawh a ni. MPWD Vision 2030 chuan Mizorama temporary bridge an enkawl zawng zawng te chu kum 2030 ral hma a permanent bridge a thlak vek a tum bawk a ni. World Bank Project atangin Chhumkhum-Chawngte Road te, Champhai-Zokhawthar Road te, Tlabung-Kawrpuichhuah Road siam that hna thawh mek a ni a, heng kawng zawng zawng te hi two-lane National Highway Standard a siam niin kum 2020 chhunga zawhfel hman tum a ni.

22)      Hmeichhiate chhunga hleilenna thleng thei ven nan Mahila Police Volunteers (MVPs) din a ni a, Aizawl ah mi 199 leh Lungleiah mi 100 te Police department ten thlang chhuakin training an buatsaih sak dawn a ni.

23)      Mizoram New Capital Complex (MINECO) Aizawl ah District Court Building, Aizawl sakna turin Cheng nuai 2360 ruahman a ni a, kumin December thla hian luah theih tur a a peih hman beisei a ni. MINECO a High Court Building sakna turin Cheng nuai 4624.12 ruahman a ni a, Lawngtlai, Champhai, Serchhip leh Mamit a Judicial Quarters sakte pawh zawh fel tep a ni a Siaha District Court building pawh sak mek a ni bawk. March ni 11, 2019 a Pu C Lalsawta’n Chairman pisa a luah atangin Mizoram Lokayukta pawh ngawrh taka kalpui a ni.

24)      Special Scheme for Recruitment of Peace Accord MNF Returnees, 2018 hnuaiah GAD a hna ruak 13 chu MNF Returnee chhungkua atangin kum 2018-19 chhung khan hnawhkhah a ni.

25)      Mizoram Sawrkar leh Hmar People’s Convention (Democratics) ten April ni 2, 2018 a inremna thuthlung an lo ziah tawh angin HPC(D) mi leh sa ten lei rem an rah a nunphung pangngai an zawm theihna tur ruahmanna siam mek a ni a. Sinlung Hills Council tilian tura hmalakna pawh sawrkar kum 2019-20 chhungin tihfel hman beisei a ni a. Sinlung Hills Council Executive Member inthlanna felfai taka kalpui a nih theih nan ‘The Mizoram (Election to Sinlung Hills Council) Rules 2019’ chu hman tan a ni bawk.

26)      Mizoram sawrkar chuan thalaite thiamna tuai hriam a ngai pawimawh hle a, hemi atan hian Mizoram State Skill Policy for Development & Entrepreneurship a duang tawh a. UPSC leh SSC a thalai tam zawk an tlin theih nan Coaching programme buatsaih a ni a tunah hian UPSC atan mi 130 leh SSC atan mi 230 an in ziak lut mek a ni.

27)       Information & Communication Technology Department kaltlangin Mizoram-a Internet service leh Mobile phone signal tha tak neih a nih theih nan hma lak mek zel a ni a, Telecom Operator hrang hrangte sawipui an niin Site 712 an neih sa bakah kan mamawh phuhru pha tur site thar 759 siam belh turin hma  lak mek a ni. Mizoram chhunga mobile service-in a thlen phak lohna khuaten Mobile signal tha tak an neih theihna turin Mobile Tower thar 227 bun belh turin chak taka hma lak mek a ni a, heng zinga Tower 33 te hi a nung tawh a, Tower 70 dang pawh phun zawh fel a ni tawh bawk.

28)    Kan thalai infiammite hmasawn zel nan kawng hrang hrang hma lak a ni a, tunah hian Mizoram Sports Policy duang turin ruahmanna chak taka kalpui a ni a. Tun sawrkar kum ral hma ngei hian National Games leh Khelo Youth Games kalphung zuiin Mizoram State Games neih tum a ni. Mizo tlangval chhuanawm ritchawi chak Jeremy Lalrinnunga pawhin hmasawn zelin 2018 Summer Youth Olympic Games, Buenos Aires, Argentina a neihah khan Weightlifting-ah gold medal a la a, Summer Youth Olympic Games-a India ram tana gold medal la hmasa ber record a siam nghe nghe a ni. Hockey khel thiam Mizo nula Lalremsiami pawhin 2018 Summer Youth Olympic Games-ah tho hian India ram tan silver medal a hlawh chhuak a, hemi hma lawka Asian Games Indonesia-a neihah silver medal vaw chhuakin Mizo zinga Asian Games silver medal dawng hmasa ber a ni.

Parade contingent zawng zawngte chungah lawmthu ka sawi a, vawiin a zirlai leh mipui lo kal khawmte, NGO, kohhran leh Mizoram mipuite chungah  sawrkar in thlawp na leh rinna innghah ngam avangin lawmthu ka sawi tak meuh meuh a ni. Mizoram hi hmasawnna kawng zawh turin a in puahchah mek a, ram ropui a kan siam theih nan tumruhna nen hmalam i pan zel ang u. State dangten zirna kawngahte, ralmuanna kawngahte, khawtlang nun nuam tak dinna kawngahte, hriselna kawngahte entawntlak a kan siam theih nan thawhpuiah ka sawm che u a ni. Vawiin kan neih theih nana an nunna hlantu kan mi huaisente hrereng ila, kan ram tan kan theih tawk i chhuah theuh ang u. Inkutsuihin, lungrual takin hmalam i pan zel ang u.

 Independence Day vawi 73-na lawmnaah hian Chief Minister Pu Zoramthanga chuan heng a hnuaia Medal leh Award-te hi a sem a:

1) President’s Police Medal for Distinguished Service – Pu Lalmuanpuia, Commandant, 2nd Bn MAP
2) Police Medal for Meritorious Service - Pi Lalthangliani, Inspector, PHQ leh Pu Laldingliana, Inspector, Armed Branch, 2nd IR Batallion
3) Governor’s Gold Medal: SI MC Lalhmingthanga, 2nd Bn MAP
4) Governor’s Silver Medal: Inspector V. Thawnghua, 2nd Bn MAP
5) State Award for Teachers 2019 – (i) Pu Rosiamhnuna, Headmaster, Govt Chaltlang High School, Aizawl; (ii) Pu Lalchhuanmawia, Hindi Teacher, Govt. Zemabawk Middle School, Aizawl, (iii) Pi Rochami, Headmistress, Govt. Rev. Thianga Primary School, Bethlehem Vengthlang, Aizawl
6) Independence Day 2019 hmeichhe volleyball tournament: Champion Team – Vakiria FC, Runner up – 2nd Mizo Batallion NCC, Lunglei

Vawiin hian President’s Police Medal for Distinguished Service dawng tura Pu Malsawma Royte, Dy.SP, CID (SB), Aizawl leh Police Medal for Meritorious Service dawng tura Pu Neihchungnunga, DG, CID, Aizawl leh Pi Lalmuanthangi, Inspector (M), Aizawl te thlan an nih thu leh, Union Home Minister’s Medal for Excellence in Investigation dawng tura Pi Lalhmachhuani Sailo, (Inspector) thlan a nih bakah Fire Service Medal for Meritorious Service dawng tura Pu Lalrosanga, Leading Fireman leh Pu R.Roluahpuia, Fireman te thlan an nih thu puan a ni bawk.

 Vawiin A.R. Ground-a Independence Day lawmna inkhawmah hian parade contingent 32 an tel a. Silai keng (Armed) Contingent 7 zinga lawmman dawngte chu – pakhatna 90th Bn BSF; pahnihna 1st Bn MAP leh pathumna 225th Bn CRPF te an ni a. Silai kenglo (Unarmed) Contingent 7 zingah pakhatna chu 1 Mizo Bn NCC (Govt. T. Romana College) niin, 1st Bn MAP School Scouts & Guides ten pahnihna an hauh a, 1st Bn. MAP School Cubs and Bulbul te pathumna an ni. School Contingent 14 zingah pakhatna chu Nazareth Hr. Sec. School a ni a, pahnihna chu Home Mission School niin Helen Lowry School chu pathumna an ni. Parade Commander chu Pu.C.S. Lalrinzuala, Asst. Commandant, 5th IR Battalion niin 2nd Commander Pu C.Lalfakmawia, SDPO, Aizawl South a ni a, kumin hian Band party 4 an tel bawk. Kumin Independence Day Parade-ah hian Nagaland atangin 11th Nagaland Armed Police lo tel in, Mizoram police te pawh Manipur-a Independence Day lawmnaah an tel ve bawk a ni.

 Aizawl a Independence Day vawi 73-na lawmna Lammual-ah neih a nih hnu hian Raj Bhavan-ah At Home programme hman leh a ni a. Chief Minister Pu Zoramthanga chuan sawm bik te tan thingpui ruai a buatsaih a ni.