India Ram Independence Day vawi 73 na chu India Ram hmun dang te rualin Kolasib ah Ropui taka lawm ani a, Kolasib AC bialtu MLA leh FCS&CA, LAD, Fisheries etc Minister ni bawk Pu K.Lalrinliana chuan khuallian niin he hun hi a hmanpui.

Minister chuan zalenna champha lawm tura kalkhawmte leh Kolasib mipui zawng zawngte chibai bukin duhsakna a hlan a Mizoram mipuiten sawrkar tharah rinna an nghah ngam avangin lawmthu a sawi a ani. Thla riat chauh a upa Sawrkar chuan hmasawnna hna tam tak a thawk hman a, Ram leh hnam hmangaihna thinlung nen hmasawnna hna tam zawk chak takin kan thawk dawn a ni ati.

Sawrkar Flagship programme ‘Socio-Economic Development Policy’ (SEDP) tih hlawhtlin chu Sawrkar thupui ber leh an intiamna a ni tiin SEDP chu hmasawnna huapzo leh ngelnghet, a chhunga mipuite dinhmun tihmasawn tur leh ei leh bar kawnga kan intodelhna tur, khawtlang nun tihmasawn tu leh mipuite hlimna leh thlamuanna thlentu tur a ni a, mipuite sum dehchhuah tihpun a tum bakah eizawnna kawng a hawn belhin hmasawnna ngelnghet leh tluantling a thlen dawn a ni ati a. Hei bakah hian hmasawnna ruhrel din hi a tum pawimawh ber pakhat a ni bawk a, SEDP hlawhtling taka kalpui a nih theih nan Minister-te enkawlna hnuaiah Board hrang hrang 14 din a ni a heng Board hrang hrangte hian chanpual insemin chak takin hma an la mek a ni a ti.

Ramchhung inrelbawlna a awlsam zawk nan leh mipuite tan awlsam zawkna a nih theih nan District pathum - Saitual District, Khawzawl District leh Hnahthial District siam thar a ni a, Deputy Commissioner Office leh Superintendent of Police Office-te pawh engkim peihfel tawh niin, sawrkar Department hrang hrangte pawh District thara an inbun felna tur ruahmanna siam tura hriattir an ni tawh bawk tih tarlangin Kan thalai infiammite hmasawn zel nan kawng hrang hrangin hma lak a ni a, tunah hian Mizoram Sports Policy duang turin ruahmanna chak taka kalpui a ni a, Tun sawrkar kum ral hma ngei hian National Games leh Khelo Youth Games kalphung zuiin Mizoram State Games neih tum a ni a ti.

Khuallian chuan Kolasib District chhunga Sawrkar hmalakna te tarlangin CZ Higher Secondary School leh RMSA School Saidan building te chu NABARD sum hmanga sak thar tum a ni tiin Kolasib Saidan ah Sports Discipline hrang hrang zirna tur SAI Centre thar buatsaih mek ani a, Sports zirlai naupangte hi a thlawna lehkha zirtir vek an ni anga Hostel naupang za chuang zet awm theihna tur a nih thu a sawi bawk.

Excluded Area Fund atanga Kolasib District-a VC hrang hrang te dawn tur zat Rs 582.52 lakh chu DLAO kutah hlan/pek chhuah theih tep tawh a, Sangha khawia eizawngtu te tan Sangha chi leh Sangha chaw a man tlawmin Fisheries Department hnuaiah pek chhuah mek a ni a, Sangha chi siamna leh a chaw siamna hi Mizoram hmun hrang hrangah kalpui mek niin Kolasib-ah pawh Zero point-ah Sangha chi siamna 50% zawh ni tawhin kumin chhunga hawn hman tum a nih thu a tarlang bawk a, Bairabi SDC office chu sa tha tura ruahman mek a ni a, he building thar hi SDO(C) a hlan kai hunah pawh an Office ni nghal tura ruahman a ni a ti.

Khuallian chuan Parade contingent zawng zawngte chungah lawmthu sawiin he huna zirlai leh mipui kal khawmte, NGO, kohhran leh Kolasib mipuite chungah  sawrkar an thlawp na leh rinna an nghah ngam avangin lawmthu a sawi bawk a. Mizoram hi hmasawnna kawng zawh turin a in puahchah mek a, ram Intodelh kan nih theih nan tumruhna nen hmalam i pan zel ang u tiin Zalenna kan neih theih nana an nunna hlantu kan mi huaisente hrereng ila, kan ram tan kan theih tawk i chhuah theuh ang u a ti a, Ram zalena awm Mipui ten mawhphurhna pawimawh tak kan neih chu Intodelh hi a ni ati.

Kolasib a Independence Day lawmna ah hian Parade Contingent 16 awmin, Armed Contingent pakhat, pipe Band pakhat, unarmed Contingent pali leh School Contingent 10 an awm a, Unarmed Contingent atangin NCC Girls, St.John’s Higher Secondary School chuan lawmman pakhatna la in NCC Boys, St.John’s Higher Secondary School chu pahnihna an ni a, Scouts & Guides St.John’s Higher Secondary School chu pathumna an ni. School Contingent ah JNV Thingdawl chu pakhatna niin, Govt.Diakkawn High School chu pahnihna an ni a, DIET Kolasib chu pathumna an ni.