Vawiin zing dar 8:00 khan HBSC Ground No-1, Hnahthial ah Hnahthial District din a nih hnu a a hmasa ber atan India Independence Day vawi 73-na ropui taka lawm a ni a, Dr. R. Lalthangliana, Health & Family Welfare, Higher & Technical Education, Commerce & Industries, changtu Minister chuan khuallian niin a hmanpui. He India ram zalenna champha lawmna niah hian March Past Contingent 14 an awm a, an vai hian school contingent vek an ni.

Minister hian Independence Day lawmna hmun a thlen veleh hian India hnam puanzar a pawt pharh a, hemi zawh hian March Past nei tur parade contingent 14 te chu endikin Parade Commander Sub-Inspector R. Lalthlamuana, 2nd Batallion M.A.P kaihhruai march past parade contingent te chibai buk a chhanglet nghal bawk a ni.

He ni lawmnaah hian khuallian chuan Hnahthial mipuite chu Zalenna chibai a buk a, India ram in zalenna a neih theihna tura tha leh zung senga an nunna hial lo hlan tu te zawng zawng chawimawina ni anih tel avangin ram tana inhlan te inpekna hre thar leh turin a sawm a, Mizo zinga India zalenna sualtu thla hmasa lawka boral ta Lunglei khaw pa Pu Darthawma zahna chibai bukin Sawrkar tha leh rintlak, dik leh felfai nei tura theihtawp chhuah zel tura a intiam thu a sawi bawk.

Khuallian chuan Mizoram mipuiten sawrkar tharah rinna a nghah ngam avangin lawmthu a sawi a. Thla riat chauh a upa nimahse hna tam tak a thawk tawh a, an intiamna ang ngeiin Hnahthial pawhin District thar nei hmanin Independence Day pawh District Headquarters dang ang bawka Minister hova hman ani thei ta chu hlawhtlinna ropui tak a ni a ti a. District fuke kim nei tura ruahmana fel tak siam anih thu a sawi. Sawrkar Flagship programme ‘Socio-Economic Development Policy’ (SEDP) tih hlawhtlin chu an thupui ber anih thu leh SEDP hlawhtling taka kalpui a nih theih nan Minister-te enkawlna hnuaiah Board hrang hrang 14 din a ni anih thu a sawi a. Raw chin leh a tihpuitlin an tum thu sawiin hemi atana tih ngai pawimawh chi hrang hrangte chak taka bawhzui mek anih thu a sawi.

Hnahthial District tihhmasawnna tura hnathawh leh hmalakna kallai mek chi hrang hrang tarlangin Thingsai Police Station building thar sak mek chu luah theih tura peihfel tep anih thu a sawi a. Hnahthial Police Family Quarters pasarih leh South Vanlaiphai Out-post Family Quarters pahnih cheithat hna thawh mek anih thu leh Hnahthial PS tan Motor thar (Bolero Camper) leh Hnahthial Trafic ten an mamawh em em Bike thar te lei sak an nih thu a sawi a. Police Out-Post thar Pangzawla awm tur leh Superintendent of Police, Hnahthial District Office sakna hmun tur ram tha tak Pangzawl Town VC leh Hnahthial N-I VC ten phal taka an pe chu lawmawm a tih thu a sawi.

Mizoram Health-Care Scheme zawmtute medical reimbursement chinfel zung zung a nih theih nan sorkarin cheng nuai 2,000 chu assistance to healthcare atan dah hran a tum thu leh, sawrkarna an siam hmasak tuma healthcare scheme an lo duan tawh chu tha zawk leh changtlung zâwka kalpui a nih theih nan Healthcare Corpus Fund atan cheng nuai 5,000 dah tum a nih thu a sawi a. Hnahthial damdawiin pawh tih changtlun chhoh zel anih tur thu sawiin Ultrasound khawl leh UPS thar dah a nih bakah thawktu indaihlohna phuhru turin Staff Nurse 3, (pathum) Health Suppervisor (Male) 1 (pakhat) dah belh an nih thu te, Ambulance thar pek an nih thu te bakah IV Grade Quarters, Tarpho Sub Centre Nau neihna room te sak mek anih thu te, Hnahthial S Clinic Centre leh Tuipui D Sub Centre leh Staff Quarter te sa tura hmalak mek a nih thu te a sawi a ni.

Minister chuan Hnahthial district chhunga kuthnathawktute hmasawnna turin kawng chi hrang hrangin hmalak mek zel a ni a ti a. Dragon Fruit leh Mandarin Orange chi a thlawna sem anih bakah a enkawlna Leitha, Damdawi, chinai thi leh hmanrua te semchhuah zel a ni a ti a. INTEGRATED TRAINING CENTRE (ITC) Hnahthial chu Certificate course atanga Diploma course a hlangkai turin theihtawp chhuah a hma lak a ni a ti a.   KVK Hnahthial in khawvel sik leh sa inthlak danglam chung pawh a kut hnathawktute tharchhuah kiam si lova,thiamna tha leh changkang zawk hmanga hna thawh tir na tur project ah chawimawina BEST NICRA AWARD, 2019 an dawng thei chu chhuanawm a tih thu a sawi.

Government College Hnahthial tihchangtlun mek anih thu Minister hian sawiin RUSA atangin Infrastructure Development nasa taka kalpui mek a ni a ti a. Govt. RK Middle school, S. Vanlaiphai, Govt. Leite Middle School leh Govt. Rotlang E Middle school building leh hmunhma te sak that mek a ni a ti a. Private English School hawn thar tur pali - Tuipui D Public English Medium, Baptist English School Tuipui D, Tender Heart Academy, Muallianpui leh New Kawnpui Primary School te hnenah School Opening Permission phalna pek an nih thu a sawi. NH 54 Serchhip atanga Hrangchalkawn kilometer 115 a thui repair chu zawhfel a nih thu sawiin, PMGSY Scheme kaltlanga Khawhri- Chawngtui Road, Thingsai – Bualpui(H) Road, Cherhlun – Ngharchhip Road, Pangzawl – Lungmawi Road siam mek chu kumin chhung ngeia zawhfel tum anih thu a sawi a. Tuichang Lui-Tumtukawn, Hnahthial – Haulawng Road Phase I  leh II, Thingsai – Tiau Lui Road, Thingsai Shortcut Road siam that hna te thawh mek a nih bakah, Tui hnianghnar zawka neih na turin Water Supply Scheme hnuaiah Leite leh Rotlang, Cherhlun, Denlung, Pangzawl, Lungleng leh Maudarh WSS te zawhfel tawh anih thu leh Aithur Water Supply Scheme (Solar Pumping) pawh a hun taka zo fel thei tura hna thawh mek anih thu a sawi.

Minister chuan vawk pul hri laka inven nan February thla khan District chhunga vawk zawng zawng vawkpul hri danna (Swine fever vaccine) in a thlawnin chiu chhuah a ni a ti a. Hei hi thlaruk dan zelah tih thin anih dawn thu a sawi a, kumin October thla ral hma a ran ke leh ka hri danna (foot & mouth desease) in Bawng leh Kel te chiu chhuak vek turin hmalak mek a ni bawk bawk. Tar chaklo zawkte leh naupangte enkawlna leh venhimna kawng hrang hrang pawh chak taka thawh reng a ni a ti a. Hnahthial ICDS Project hnuaia khaw 25-ah Anganwadi Centre 115 changtlung taka kalpui anih thu leh naupang kum 6 hnuailam 2579, raipuar 348, naupawm 284 beneficiaries te an awm mek thu a sawi a. Tar pension mi 1318, rualbanlo tanpuina mi 37 leh hmeithai tanpuina mi 73 te hnenah pek thin an ni a ti.

Minister hian thu a sawi zawh ah March Past Parade contingent te hnenah lawmman a sem nghal a, a titha zualte chu : Pakhatna – Govt. Hnahthial High School Girls Contingent, Pahnihna – Moriah Public School, Hnahthial. Pathumna – Govt. Southern High School Girls Contingent te an ni a, parade contingent zawng zawng hnenah participation prize sem vek a ni.