Vawiin khan Chhangphut Field Champhaiah India ram Zalenna Ni Independence Day vawi 73-na chu urhsun takin hman a ni a. Champhai District a lawmna pui berah hian Pu TJ Lalnuntluanga, Law and Judicial, Environment Forest & Climate Change, Transport leh Parliamentary Affairs changtu Minister chu khuallian a ni a,  hnam puanzar pawtpharhin parade contingent 20-te chibai bukna a chhanglet a. Naupang huaisen lawmman Jeevan Raksha Padak dawngtu Lalthasangzuali D/o Roluahpuia Chalthleng, Champhai Kahrawt, King Solomon’s School-a Class –IX zirlai hnenah chawimawina Medallion leh Citation hlanin Parade Contingent tithate lawmman a sem nghal a ni.

Khuallian Pu TJ Lalnuntluanga ram dang awp behna atanga Indiain Zalenna neia ram ropui tak anih theihna tura hruaitu hmasa leh nunna hlu tak hlantute  chu hriatreng an nih thu sawiin,  India ram chu ram hmasawn leh ropui ber pawl a hlan kai a ni, a ti a. India khua leh tuite chu ram hmasawn zel leh inpumkhatna kawngah mawhphurhna an neihte hlena theihtawp chhuah turin a sawm a. Mizoram sawrkarin kuthnathawktute leh thalaite eizawnna ngelnghet siam a ngaihpawimawh thu sawiin, hemi tihlawhtliang turin Socio Economic Development Policy (SEDP)  hmanga ruahmanna hrang hrang siam a ni a,  Borad hrang hrang duan niin, chak taka hmalak mek zel a ni, a ti a. SEDP hnuaiah Food & Fruit Processing Plant, Cold Storage buatsaih leh man man zawka thlai tharte hralh tum anih thu a sawi a. Champhai Leilet humhalha tangkai taka hman anih theihna tura Land Development lama tan lak leh revenue dante a tul anga ennawnna  Land Reform-te siam a hmathar lak mek a ni, a ti a. Minister chuan Sawrkar inrelbawlna mumal tak  mipuite rinngam, langtlang, mawhphurhna hlen thin   thianghlim taka rawngbawl mipui sawrkar din chhoh zel tura hmakal zel anih thu sawiin,  hlemhletna umbo kawnga hmala tur Lok Ayukta pawh dinfel ani tawh bawk a ni, a ti.

Khuallian chuan inkalpawhna kawng siam kawnga sawrkar hmalakna hrang hrangte tarlangin, kumin kum tir lamah Aizawl leh Champhai inkar kawngpui chhe zual lai siam thatna tura cheng nuai sangkhat  dah anih thu leh Keifang leh Kawlkulh inkar siam thatna tur cheng vaibelchhe 29.27, Khawzawl leh Champhai inkar siamna tur  cheng vaibelchhe 26.60 te chu sawrkar laipui atanga dawn anih tawh thu sawiin, tender chhuah tawh peihfel ve leha thawh tan nghal mai tawh tur a ni, a ti a. Seling leh Champhai inkar kawng Double Lane a siam tur pawh NHIDCL in an thawh tur thu leh Zotlang Tlangsam Ring Road leh Champhai khawchhung kawng thalote siam hna pawh thawh thuai tuma hma lak a ni a ti bawk. Champhai District-ah zirna tihhmasawn kawngah sawrkarin theihtawp a chhuah thu sawiin, Mizoram University Eastern Campus Champhai hmuna dah anih theiha turin Central sawrkara HRD Ministry pawh a tul anga dawr anih tawh thu sawi a. Zofate Kut pawimah tak tak   Chapchar Kut, Khuado Kut leh adangte hmunhma nghet leh changtlung taka hlim taka hman ho anih theihna turin Champhai Tlangsamah Cultural Centre, Ecotourism Park nena  awm kawp tura a tul ang zela hmalak anih thu a sawi a. Mipui hriselna leh damloh nikhua a inenkawlna sawrkarin a ngaihpawimawh thu tarlangin, Champhai Civil Hospital-ah Dialysis khawl, ICU leh Private Cabin-te siam tura sum dah fel ani a, reiloteah neih theih besei a ni, a ti a. Kalphung felfai zawka Champhai cheibawla hmasawnna kalpuina turte, Leilet mumal taka enkawl anih theihna turin Champhai Maser Plan ruahman anih thu leh  hemi tur hian Preliminary Survey leh Champhai Master Plan Committee-te pawh peihfel anih tawh thu a sawi bawk.

Transport Minister chuan Zofate inpumkhatna leh inkalpawhna tur atan Champhai leh Tahan inkarah Mizoram State Transport Bus tlan tir tuma hmalak mek anih thu a sawi a, Churachanpur leh Jampui lama Zofate awlsam taka kalpawhna turin MST Bus pawh tlan tur tura hmalak mek ani, a ti a. Mipuite  harsatna sutkian sak turin Road Tax kum 15 atana pek thin chu kum tum chhungin installment a pek a nih tawh tur thute, Lirthei nei chhiah ba mekte chhiah pung ngaihdamna hun July-August 2019 chhung a hawn anih thu a sawi a. Commercial Vehicle permit inhlanchhawn kawngah Sawrkarin rokhawmna dan neite tan chauh a phal thu sawiin, hemi atan hian  hmingthlak tumte tan thla 6 chung hmingthlakna hun hawn niin, hemi hun chhunga tifel vek tura beisei an ni, a ti a. Lui dungte tangkai zawka hman anih a chakkhai lakluhna atana hman anih theihna turin Inland Transport lama ngaihtuahna nasa zawka sen anih thu a sawi a ni.

Pu TJ Lalnuntluanga chuan thenawm ram Myanmawr nena insumdawn tawnna leh him taka inkawlpawh tawnna  a awm theihna turin Zokhawtharah Immigration and Integrated Check Post leh Land Custom Station changtlung tak siam tuma hmalak mek anih thu sawiin, hemi kawngah hian  sawrkar laipuiin chak takin hma a la mek a ni, a ti a. Champhai Kanan Veng leh Lersia Field Ruantlanga Leimin avanga chhungkaw tam takin harsatna an tawrh phah chu pawi a tih thu la sawi a,  Sawrkarin an harsatnate hriain hma a la a,  hamthatnate   pek an nih theihna turin sawrkar laipui pawh a dawr reng thu a sawi a. Champhaiin tui in tur hnianghnar leh thianghlim a neih theihna turin Champhai Water Supply Scheme thar duan a ni, a ti a. Forest Minster chuan nungcha, thing leh mau humhalh kawngah nasa taka tanlak anih  thu sawiin, Zokhua, Khawpui, Luipui dung leh Kawng dungahte uar zawka thingphun  beihpui thlak tum a ni, a ti bawk.

Khuallian chuan Champhai hmasawnna leh hmachhawp hrang hrangte tihpuitlin kawnga Chief Minister zahawm tak Pu Zoramthanga thahnemngaihna a fakin lawmthu a sawi a. Parade contingent zawng zawngte chungah lawmthu a sawi a, mipui kalkhawmte chu Zirna kawngahte, ralmuanna kawngah te, khawtlang nun nuam leh hrisel din kawngah te State dangte entawntlak nih tum turin a chah a. Ram hmasawnna leh dinchhuah kawnga lungrual taka sawrkar leh amah mimal ngei pawh tawiawm tlat thin turin a sawm nghal a. India ram Zalenna ni hun nuam leh duhawm tak hmang theuh turin duhsakna a hlan a ni.
 
Vawiin Independence Day March-Past hi Parade Commander Sub-Inspector Joseph Lalhnehzela chuan kaihruaiin, contingent 20 zingah hian Armed Contingent 1, Unarmed Contingent 4, School Contingent 14 leh SSA Pipe Band-te an tel a. Parade entir zingah hian school contingent-te atangin titha pathum thlanchhuah niin,  Bethel Mission  School Contingent chu pakhatna a puan an ni a,  BC English Academy   Contingent chu pahnihna niin, pathumna chu King Solomon’s School Contingent an ni a. Armed leh Unarmed Contingent inkawpah Mizoram Police Contingent pakhatna niin, Govt Champhai College NCC Senior Wing chu pahnihna niin, Govt GM High School NCC Boys Contingent-te chu pathumna an ni. Heng bakah hian Badminton Tournament buatsaiha lawmman te sem chhuah niin, Pu R.Roluahpuia, Fireman, National Fire Service Awardee for Meritorious Service lawmpuina hun siam ani bawk.

Independence Day lawmna hun Chhangphut Field-a neih zawh hnu hian Independence Day Chief Guest hovin official leh mi sawm bikte tan Jericho Garden, Keifangtlang, Champhaiah ‘VIP’s At Home’ function neih a ni a. Chawhnu lamah Pu TJ Lalnuntluanga’n Champhai District Football Association buatsaih Independence Day Football Tournament Final khuallian niin a hmanpui a,   Final match hi Zotlang FC, Champhai leh Dinthar FC, Aizawl ten an khel a ni.