Vawiin khan Home Minister Pu Lalchamliana’n Mualvawm, Khawzawlah India National Flag pawt parhin 73rd Independence day lawmna hun a hmanpui a, Pu Lalbiakthanga Khiangte, DIG (NR), Pu FJ Liantluanga, Director DM&R, Pu Kailiana, Commissioner of Taxes te bakah Khawzawl DC leh SP leh sawrkar mi pawimawh hrang hrang, khawtlang hruaitute leh mipui thahnem takin an telpui a ni.

Home Minister Pu Lalchamliana chuan India ramin 15th August 1947 a British awpna hnuai ata zalenna kan neih theih nana nunna hlu tak hlan tute inpekna ropui zia te hre reng a, ngaihhlut nachang kan hriat fo a pawimawh thu a sawi.

Home Minister chuan Khawzawl District a changtlun zel theih nan hmalak mek anih thu a sawi a, Ni 3, June 2019 khan DC leh SP Office dinna turin sawrkarin thuchhuah a siam a, inrelbawlna atana an mamawh anga hma an lak theih nan DC office tan Cheng nuai 150 leh SP Office tan Cheng nuai 140 pek ani tawh a ni,” a ti a, He district tharin district anih anga Independence day a hman hmasakna berah hian kan Chief Minister zahawm tak Pu Zoramthanga leh kan Deputy CM Pu Tawnluia, helai bialtu leh kan Speaker Pu Lalrinliana Sailo te theihtawp chhuah thinna chungah lawmthu sawi kan ba nasa hle a ni, a ti.

Pu Lalchamliana chuan sawrkar hmalakna pawimawh zual hrang hrangte tar langin, Sawrkar Flagship Programme SEDP chak taka a kal theih nan board 14 din anih thu te, Mizoram Police tih changtlun nana NLCRP hmanga Police headquarters,  Khatla, Aizawl leh 3rd Bn IR awmna tur Thingkah, Lawngtlai district a sak mek chu peih fel tep anih thu te, Mizoram Police hnuaiah Aizawl, Lunglei, Kolasib leh Champhai ah Emergency Response & Support System mipuite tana hman tan theih a hawn anih thu te a sawi.

 Minister chuan sawrkar laipuiin faina kawnga hma a laknaah Mizoram chu hmahruaitu zinga kan tel mek thu a sawi a, ‘Kum hmasa khan Mizoram chu Open Defecation Free ah puan kan ni a, ODF a puan state 13 na kan ni hial a ni,’ a ti a,’ District fai leh thianghlimna kawnga entawntlak ni turin hma i la tlang zel ang u,’ a ti bawk.

Home Minister chuan sawrkar department hnuaia hmalakna te tar langin PHE department kaltlangin mi tinin tui thianghlim hnianghnar zawka kan dawn theih nan 10 % GBS (Gross Budgetary Support) hnuaia siam Greater Khawzawl WSS leh Biate WSS te chu zawhfel thuai beisei a nih thu leh NRDWP hnuai a siam Tualte WSS leh Tlangpui WSS te pawh zawh fel tep anih thu a sawi a. Power & Electricity Department hmalakna hnuaiah 20MW pe chhuak thei tura duan Vankal Solar Park kum tharah zawh fel hman beisei a nih thu te, PSDF Scheme hnuaiah Khawzawla 132 KV Sub-station siamthat hna thawh mek a nih thu leh IPDS Scheme atangin Modernization of Power Supply hna thawh niin Khawhai-ah thawh zawh a ni tawh thu leh Biate-ah bul tan leh mek a nih thu a tar lang bawk a ni.

Minister chuan kawphetha a intodelhna kawngah hma chak taka lak anih thu sawiin,’ Mizoram hi India hmarchhak state zinga SAUBHAGYA (Pradhan Mantri Sahaj Bijli Har Ghar Yojana) scheme tihlawhtling hmasa ber kan ni a, chhungkaw 25,755 kawlphetha pe tura Sorkar laipuiin min tuk chu kan tihlawhtling tawh a ni,’ a ti a,’ Khawzawl Power Division hnuaiah pawh BPL chhungkaw 414 hnenah a thlawnin electric connection pek a ni a. Rural Electricity Distribution Backbone Scheme hnuaiah Rabungah 33/11kV Sub-Station thar sak mek a ni,’ a ti bawk.

Pu Lalchamliana chuan ,’Zirna hi ram leh hnam chhanna atan a thil pawimawh lian tak pakhat a ni a, Central lamah Officer lian neih belh kan mamawh zia hriain kan Sorkar chuan UPSC leh SSC a thalai tam zawk an tlin theih nan Coaching programme a buatsaih a ni,’ a ti a,’ Thalaite thiamna tuai hriam a mahni kea ding a eizawng thei tura chher chhuah hi kan ngai pawimawh hle a, hemi atan hian Mizoram State Skill Policy for Development & Entrepreneurship duan niin kut hnathawk a eizawngte tan Employees State Insurance Society din a ni,’ a ti bawk. Home minister chuan Deputy CM thahnem ngaihna leh Sawrkar hmalakna in UD&PA department kaltlangin Mualvawm field laih zau leh Artificial grass phahna turin cheng Vaibelchhe 7 ruahman anih tawh thu a tar lang bawk.

Home Minister chuan Zirna kawngah te, ralmuanna kawngah te, khawtlang nun nuam tak dinna kawngah te, faina leh hriselna kawngah te entawn tlak a Khawzawl district siam turin kalkhawmte a chah a,” Model District ni turin theihna kan nei a, kan district chhunga khaw tin hi felfai tak leh inrelbawlna nei tha tak kan nih sa avangin beiseina ka nei sang hle a ni,’ a ti a. District thar tan hian department tih changtlun ngai leh dah belh ngai tamtak a awm tih sawiin, Khawzawl District mipuite chu district in hma a sawn zel theihna atan theihtawp chhuaha tangrualin hmasawnna hnathawh kawnga Sawrkar thlawp chunga tan la tlang zel turin a chah bawk a ni.

Vawiin Khawzawl a Independence Day lawmnaah hian Parade Contingent 19 an in lan a, Zaipawl leh Cultural show te entir niin Independence Football final match khelh a ni bawk. Hemi zawh hian DC Rest house ah sawm bikte nen VIPs at Home a hmanpui nghal bawk a ni.