1770/2024-2025

Lawngtlai, the  27th August, 2024: Vawiin chawhnu dar 1 khan September ni 5, 2024-a ‘Zirtirtute Ni’ hman dan tur relin Lawngtlai District Level Committee on Celebration of Teachers’ Day 2024 chu an Chairman leh District Bawrhsap nibawk Pu Cheemala Siva Gopal Reddy, IAS, kaihhruaiin  DC Conference Hall, Lawngtlaiah  an thukhawm.    

He hunah hian thutkhawm kaihruaitu Pu Cheemala Siva Gopal Reddy, IAS, chuan  member kalkhawmte hnenah lawmthu sawiin, “Zirtirtute Ni”  anih angin zirtirtute chawimawina leh anmahni zahna lantir a hun hman a tul hle a ti a. Zirtirtute chu nakin lawka ram leh hnam hruaitu tur chher a, thiamna petu an nih angin chawimawi an phu hle a, chutih rualin zirtirtute pawhin an pawimawhna, nu leh pa, ram leh hnam innghahna an nihnate an hriatchian a ngai  a ti. 

Pu Cheemala Siva Gopal Reddy chuan Lawngtlai district khawpui leh  thingtlang lam school- ah zirtirtu leh zirlai awm dan inthlau lutuk awm thin veiawm a tih thu tarlangin, ideal ratio ( zirlai - 20 ah zirtirtu-1) awm tura tih chu tih hlawhtlin hmasak a ngai a ti a. District Education Officer (DEO) leh Education Department, LADC ten chak zawka hma lak a tul a ni, a ti. Zirna In  tam taka building leh infrastructure- te a chhe tawh hle nia a hriat thu sawiin,  school building sak that emaw sak thar leh a tul ang anga hmalak ngaihna zawnah theihtawp chhuah a tul tak zet tiin, theihtawp chhuahpui turin kalkhawmte a sawm a, Techers'  Day 2024 tha leh hlawkthlak taka hmang turin Zirtirtu zawng zawngte duhsakna a hlan nghal bawk.

Pi K. Lalsiamliani, District Education Officer (DEO) leh Member Secretary ni bawk hnen atangin nikum (2023) lama 'Zirtirtute Ni' hman dan report tawi ngaihthlak niin kumina hman dan tur sawiho nghal a ni a.

Lawngtlai District chhunga Zirna In zawng zawngten an remchan dan angin Teachers'  Day 2024 hi lo hmang se, Circular pawh pek vek nise an ti a.  Zirtirtute Ni- puala Thuchah chhiar chhuah tur chu Deputy Commissioner hminga siam ni se, Thuchah hi District Education Officer (DEO) in lo buatsaih se, Zirna In zawng zawng bakah DIPRO kaltlangin Cable Network leh Social Media lamah tihchhuah nise an ti bawk. 

Zirtirtute Ni- pualin Banner siam leh nise an ti a, kum danga lo tihtawh thin angin heng - DC Office Complex, Areopagy, AOC Square,  LADC Main Gate leh Chandmary Square ah te September ni 1 atangin tar ni se an ti a. State Level Working Committee on Observerance of Teachers' Day 2024 thuchhuak angin,  National Teachers’ Welfare Fund (NTWF) Contribution Rs. 200 chu pawmpui niin, he Fund hi District Education Officer (DEO) Office- ah thehluh theuh ni se an ti a ni.