1771/2024-2025

2024 Thlazing ni 27: Vawiin khan Lunglei District Level Implementing Committee (DLIC) on Mission Shakti chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah ṭhu khawmin, Lunglei District chhunga Mission Shakti hnuaia hma lakna hrang hrang kalpui dan tur an sawi ho.

Chairman Pu R. Lalṭhazuala chuan hmeichhiate venhimna leh an hamṭhatna atana hma lakna chu sawrkarin a ngaih pawimawh tak thil a nih avangin hma lak dan tur pawh uluk taka  ruahman a ṭul thu sawiin, member-te chu ngunthluk taka ngaihtuahna seng turin a sawm a. DLIC Convener, Lunglei District Programme Officer (WCD) Pu C. Lalnunfela chuan ṭhut khawm buatsaih chhan leh thu ngaihtuah tur sawi zauvin, Lunglei District Hub for Empowerment of Women (DHEW)-a District Mission Co-ordinator Pi K. Lalrinawmi chuan Mission Shakti chungchang leh Lunglei District chhunga hma lak tawh dan a tar lang a. Sawrkar laipui leh state lam aṭanga chawlhkar tina hma lak dan tur ruahmanna duan sa thlir ho niin, he ruahmanna zuia Lunglei District-a hma lak dan tur sawi ho nghal a ni.

He hunah hian June ni 21 leh October ni 4, 2024 inkar chhunga Mission Shakti hnuaia 100-day special awareness cum enrolment drive kalpui mek dan thlir ho niin, hmabak la awmte sawi ho a ni bawk a. 100-day programme hnuaiah hian department, sikul, kohhran leh pawl hrang hrang nen ṭang tlangin hmeichhiate humhalhna leh venhimna dan hrang hrang te, hmeichhiate hamṭhatna tur sawrkar ruahmanna hrang hrang te, hmeichhiate'n eizawnna leh thiam thil chhawr tlak an neih theih nana zirtirna te, hmeichhiate dikna leh chanvo humhalhna kawnga inzirtirna te kalpui mek a ni a. Tun kar leh thla thar atan hma lakna tur ruahmanna siam niin, August ni 30, 2024 (Zirtawpni)-a DC hova sikul naupangte hnena zirtirna neih paha DEO Complex-a thing phun te, health department hnuaia adolescent health leh school health te nen ṭang kawpa awareness programme buatsaih te, peer educator-te leh naupang sikul kai lo (out of school children)-te zinga programme buatsaih te, September ni 2 - ni 6 chhunga legal awareness week kalpui te bakah, Mission Shakti hnuaia hma lakna hrang hrang vil zui dan tur te rel a ni.

Mission Shakti hi hmeichhiate humhimna leh chawi kanna (safety, security & empowerment of women) atana hma lakna niin, 15th Finance Commission hun chhung - kum 2021-22 aṭanga kum 2025-26 chhunga kalpui tura duan a ni a. Hemi hnuaiah hian peng (sub-scheme) pahnih - SAMBAL (Safety & Security) leh SAMARTHYA (Empowerment) angin hma lakna kalpui niin, SAMBAL hnuaiah hian hmeichhia, nu leh a fate, hleilenna tuarte lo enkawl a, lo tuam dam a, an mamawhna zawna ṭanpuina pe tura din, ni 5 leh zan 5 awm theihna - One Stop Centre (OSC) te; harsatna leh hleilenna tuar hmeichhiate'n eng tik lai pawha an biak pawh theih Universal Women Helpline (WHL) toll free no. 181 leh nau piang zat, chanvo leh dinhmuna mipa leh hmeichhe inthlauhna nasa lutuk tireh tura hma lakna - Beti Bachao Beti Padhao (BBBP) te kalpui a ni a. SAMARTHYA hnuaiah hian HEW kal tlangin hmeichhe baihvai, belh tur mumal nei lote tana tluk luhna tur, kum 3 aṭanga kum 5 thleng awm theihna - SHAKTI SADAN (Integrated Relief and Rehabilitation Home) te; PALNA - Anganwadi-cum-Creche Centre te; hmeichhia khualkhuaa hna thawk leh lehkha zira awmte senso tlem zawka an awm theihna tur - SAKHI NIWAS (Working Women Hostel) te leh nu fa tir pai/pawmte'n ₹ 5,000/- leh fa pahnihnaa hmeichhe hringte'n ₹ 6,000/- an dawn theihna, nau pai/nau pawm tana hamṭhatna (Maternity Benefit Programme) - Pradhan Mantri Matru Vandana Yojana (PMMVY) te kalpui a ni bawk.

Lungleiah chuan OSC hi Serkawnah, Shakti Sadan hi Bazarvengah leh Sakhi Niwas hi MHIP Sub-Headquarters enkawlin Chanmari-ah te a awm a ni.