No.2659/2021-2022
Khuangchawi thla ni 20, 2021: Vawiin khan Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah Lawngtlai khawpui chhunga thil man (price) chungchang sawi ho a ni.

He hunah hian Lai Autonomous District Council (LADC)-a Executive Member i/c Land Revenue & Settlement Pu C. Hrangthianga bakah, LADC-a LR&S official te, FCS&CA leh Legal Metrology official te, Taxation official te, consumer association leh sumdawng pawl ai awhte an tel a. Lawngtlai khawpui chhunga mipui mamawh bungrua leh ni tin mamawh man to lutuk a ziaawm theih nana hma lakna tur hrang hrang an sawi ho a ni.

Thil man to lutuk chu mipuite tan phurrit a nih avangin, thil man to chhan nia lang te, a sut kian dan tura rawtna hrang hrangte chu he hunah hian sawi ho a ni a. Sumdawngte'n maximum retail price (MRP) aia tova thil an hralh loh nan leh bukna dik tak hman a nih a, mipuite'n buk tling ngeia thil an lei theih nan hma lak ni se, tih a ni a. Consumer-te dikna chanvo humhalh tur leh mipuiin an dikna atana beih nachang an hriat theih nan zirtirna uar lehzuala kalpui ni se tih a ni bawk.

He hunah hian thil leitu mipuite dikna chanvo humhalh zel a nih theih nan LADC-a Price Control Committee-in thil man zat a bi thliah leh hemi kaihhnawih dan hrang hrangte chu Lawngtlai khawpui chhungah thuneitu lamin khauh taka kenkawh an tum thu tar lan a ni bawk.

Attachment

  • Loading attachment...