No.2658/2021-2022
Aizawl, 20th October, 2021: Naupang kum 1-19 inkarten rulhut an pai lohna tura rulhuthlo pek beihpui leh rulhutin a nghawng thalote inhrilhhriatna hun National Deworming Day 2021, thawhhnihna October ni 18 atanga ni 30, 2021 chhunga Champhai District-a kalpui tur chu vawiin khan I&PR Conference Hall, CHANEM-ah District Bawrhsap Pi Maria C.T. Zuali chuan khuallian niin a hawng.

Pi Maria C.T. Zuali chuan ram hmasawn zelah hriselna kawnga hmalaknate ngaihpawimawh a nih thu sawiin, rulhut pai lo turin tih theih awlsam tak; kut silfai that, thlai leh thei eitur silfai that, tui thianghlim chauh in, ekin tha leh thianghlim taka inthiar, eitur khuh that leh in leh a vel vawn faite tha taka zawm a tul thu a sawi a. Health & Family Welfare Department bakah Department hrang hrang leh NGO a thawktute thawhhona leh thawhrimna kaltlangin National Deworming Day hlawhtling taka hman a nih theih thu sawiin, thawhhona tha tak hnuaiah National Deworming Day thawhhnihna hlawhtling taka kalpui a nih theih nana duhsakna hlanin rulhuthlo ei beihpui leh inzirtirna kalpui tur chu a hawng a ni.

He hun kaihruaitu Dr. R. Lianmawia, Chief Medical Officer, Champhai chuan National Deworming Day (NDD) chungchang a sawifiah a. National Deworming Day chu Mizoramah kum 2016 February atangin hman tan a nih thu sawiin, February leh August thlaahte Deworming day hman thin a ni, a ti a. Naupang leh tleirawl/rawlthar zawng zawngte rulhut laka an lo fihlim theih nan National Deworming Day hi India ramah kum 2015 ah khan bul tan a ni a, India ram pumah February 2016 atang khan hman chhunzawm a ni, a ti. He hmalakna hi rulhut pai vanga natna hrang hrang thleng theite, thisen tlakchhamnate leh naupang thanthu umbo nan a duan a ni a, kum 1-19 inkarte tan kum tin vawihnih rampum huapin a rual a rulhut hlo ei beihpui thlak thin a nih thu a sawi bawk.

Pu Lalramzauva, DEIC Manager leh Pi K. Lalengliani, RKSK Co-ordinator ten National Deworming Day chungchanga hriattur pawimawh inhrilhhriatna leh sawifiahna an nei a, hemi hnu hian Pi C.Lalramengi, DPM, National Health Mission (NHM) chuan lawmthu sawiin hun a khar a ni.

National Deworming Day hi kum khatah tum hnih neih thin a ni a. February leh August thlaahte kalpui thin niin, kumin hian hrileng avangin thawhhnihna hi tih tlai a ni. Kumin atana a thawhkhatna National Deworming Day February 2021 hmang khan Champhai District chhunga naupang kum 1-19 inkar mi 48100 zinga 47250 te rulhuthlo pek an ni a, hei hian target za zela 98.23 (98.23%) a tling a ni. A thawhhnihna kaltlang hian naupang kum 1-19 inkar mi 51100 te hnenah rulhuthlo pek tum a ni.

Rulhuthlo pek chhuah tur Albendazole mum khat zel hi 400 mg a ni a. Kum 2 hnuailam tan mum chanve 200 mg a ei tur a ni a. Kum 2 chin chunglam tan mum khat 400 mg a ei tur a ni.