164/2026-2027

Lawngtlai, 16th April 2026: Vawiin khan 'Tho Law Dir Tuah' (Standup Lawngtlai) hawnna inkhawm chu  DC Conference Hall-ah neih a ni a. Lawngtlai Bawrhsap Pu Donny Lalruatsanga chuan kaihruaiin, Dr. Lorrain Lalpekliana Chinzah, Adviser to Chief Minister (H& FW, A& FW)  leh Lawngtlai East bialtu MLA nibawk chuan Khuallian niin hawnna a nei. Pu C. Lalsawmzuala, Chief Executive Member, LADC leh Pu JB Vanhoy, EM, LADC - te chuan an hmanpui. 

Dr. Lorrain Lalpekliana Chinzah chuan Lawngtlai khawpuia hmasawnna  leh inrelbawlna tha zawk awm tura mitin chhawr theih tura 'Tho Law Dir Tuah'  lawm taka a hawn thu a sawi a. Lawngtlaiah State sawrkar leh LADC- te pheikhairual taka an kal dun a pawimawh hle tih tarlangin 'Tho Law Dir Tuah' chuan thawhhona tha zawk a thleng ngei a beisei tih a tarlang a. Lawngtlai District - chu Mizoram District dangte nen tehkhinin hmasawnna tur a tam hle a, sawrkar pahnih kalkawp a nih angin tha zawka hnathawh a nih chuan hmasawnna rahbi thar kai a ni dawn a, chu chuan mipuiteah lungawina a thlen ngei ang a ti. A bik takin Faina leh thianghlimna, traffic leh motor parking lamah tan lak thar a ni tur chu lawmawm a tih thu tarlangin, theihtawpa thawhho erawh a pawimawh dawn hle a ni, a ti. Hmasawnna tha zawk awm turin sawrkar bakah VC, NGO, Kohhran leh mipuite an pawimawh dawn hle tih tarlangin, theih ang anga sawrkar tawiawm thn turin a sawm a ni. 

Adviser to Chief Minister chuan khawpui nuam leh District changkang zawka siam turin MLA a nihna anga tha hnem ngai taka a thawh zel tur thu  a sawi a. Hemi kawngah hian sawrkar department - te Lawngtlai hmangaihna nena thawk turin a fuih a. Hlawhtlinna leh hmasawnna tlian tling awm turin mimal emaw pawl hming khat anga hmalak mai theih a ni lo tih tarlangin, mitinin mahni zawn theuhah thahnem ngai taka thawh a tul a ni, a ti. Lawngtlai District- nuam zawk leh chhenfakawm siam turin a chhunga chengte an pawimawh tak zet tih tarlangin Dr. Lorrain Lalpekliana Chinzah chuan ram leh hnam hmangaihna nena theihtawp chhuah zel turin sawrkar department leh mipuite a sawm nghal bawk. 

Pu C. Lalsawmzuala chuan 'Tho Law Dir Tuah' hlawhtlinna turin LADC chuan theihtawp a chhuah tur thu a tarlang a. Hemi kawngah hian LADC leh District Administration - te thawhhona tha tak a awm a tul tiin, tha taka thawhho a nih tur thu a sawi a. Lawngtlai khawpui hmasawnna tura thawh chu mimal taka a vei thu tarlangin, thahnem ngai taka a thawh tur thu a sawi a. Lairam mipuite faina leh thianghlimna, lirthei enkawl kawngah leh Ruihhlo kdo kawngah ding nghet Ngam turin a fuih a. Lawngtlai khawpui nuam leh felfai zawk siam turin thawhhona tha a awm a tul dawn hle a, State sawrkar, LADC, VC, NGO, Kohhran leh mipuite thawhpuiah a sawm nghal a ni. 

Pu Donny Lalruatsanga chuan Lawngtlai khawpuiin kawng hrang hranga hmasawnna tur a ngsh hle tih a tarlang a. A bik takin  faina leh thianghlimna, khawpui cheimawi leh Traffic Management - lamah tan lak a nih tur thu a sawi a. Khawpui nuam leh mawi, inrelbawlna felfai zawk siam tura District Administration leh LADC - ten theihtawp an chhuah turah Tlawmngai Pawl, Village Council, Kohhran leh mipuite tawiawmna tha a ngen a ni. 

Pu JB Vanhoy, EM, LADC, i/c Sanitation Department-  pawhin thutawi sawina neiin, Lawngtlai khawpui hmasawnna tura hmalakna turah theihtawp chhuah a ni ang a ti a. Lawngtlai khawpuiin hmasawnna tur kawng hrang hrang a nei tih tarlangin, a bik takin faina leh thianghlimna kawngah theihtawp chhuah a nih tur thu a sawi. 

Vawiin hun hmannaah hian Pu PC Lalchunglura, Superintendent of Police,  chuan kalkhawmte lawmna thu sawiin, Pu Jammy Vanhmingliana SDC chuan Power Point Presentation neiin hun a hmang a. Pu HC. Vanlalruatpuia, District Council Transport Officer chuan lawmthu sawina neiin hun a khar.