165/2026-2027

Aizawl, the 16th April, 2026: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin chawhma khan India ram Chhiarpui 2027 atana Mizoram puma Houselisting and Housing kalpui tur inziahluh bultanna Lok Bhavan, Aizawlah a nei. Hemi hnu hian ram chhung hmun dangte rualin Mizoramah Houselisting and Housing chhiarpui kalpui tan a ni. 

Larsap General (Dr) Vijay Kumar Singh chuan chhiarpui buaipuitute chu hmaih awm lo tura theihtawp chhuah tura chahin, hriat thiam loh neite pawh tha taka hrilhfiah zela, India ram chhiarpuia inziaklut vek thei tura tan la turin a chah a. A vawi khat nana digital census kalpui a ni chu phurawm a tih thu sawiin, a hlawhtlin ngei theih nan mipuite pawh chhiarpui buaipuitute tha taka lo tawiawm turin a chah bawk. 

He hunah hian Lok Bhavan atana Enumerator ruat Pi H. Lalremruati chuan Larsap-in April ni 7, 2026 a Self Enumeration a lo tih tawh atanga Self Enumeration ID (SE ID) a dawn hmangin tul angte a tifel a, Larsap hian Houselisting and Housing a zo fel a ni.

Mizorama Houselisting and Housing bultannaah hian Directorate of Census Operations atangin Pu Joseph H. Lalramsanga, Municipal Commissioner cum Principal Census Officer, Pi Irene Zohlimpuii Chongthu, Addl. Secretary, GAD & Addl. State Nodal Officer leh official dangte'n Larsap hi an tawiawm a ni. 

Chhiarpui 2027 hi India rama digital census hmasa ber tur niin, thawh hniha kalpui tur a ni a. Thawh khatna Houselisting and Housing hi April 1, 2026 atang khan kalpui tan a ni a. Thawh hnihna, Population Enumeration hi February 2027-ah neih tan tur a ni thung ang. Thawh khatna hnuaiah hian April 1, 2026 atanga April 15, 2026 chhung khan mahni inziahluh Self-Enumeration neih a lo ni tawh a, vawiin April 16, 2026 atanga May 15, 2026 thleng hian Houselisting and Housing kalpui a ni ang.

Larsap-in Houselisting and Housing a tih fel hnu hian Chief Minister Pu Lalduhoma chuan chawhnu dar 1 khan a Pisa-ah April ni 1, 2026 a Self Enumeration a lo tih tawh behchhanin Houselisting and Housing a ti fel a. Sawrkar hotu dang vawiina census enumeration tite zingah Home Minister Pu Sapdanga leh PWD Minister Pu Vanlalhlana te pawh telin, an chenna inah chawhma dar 11 khan bialtu Census Enumerator-te'n General Administration Department, Aizawl Municipal Corporation leh Directorate of Census Operations hotute hriatpuiin an tifel a ni.

Sawrkar chuan tluang leh felfai taka chhiarpui kalpui anih theih nan mipuite chu anmahni rawn pan chilhtu Census Enumerator-te tha taka lo tawiawm tur leh, an hriat duhte tha leh dik taka lo chhang turin a ngen a ni.