Vawiin khan Lawngtlai Bawrhsap Pi Shashanka Ala, IAS hovin Lawngtlaia tlawmngai pawl, kohhran leh khawtlang hruaitute leh sumdawng lirthei neitute chu DC Conference Hall-ah an thu khawm a. Novel Coronavirus (COVID-19) hrileng mek chungchanga Lawngtlai District-a hma lak dan tur hrang hrang an sawi ho.

Lawngtlai Bawrhsap chuan COVID-19 chungchanga hma la turin District Level Task Force din a nih thu leh hma lakna eng emaw chen kalpui a nih tawh thu a sawi a. Tun thlenga hma lak tawh dan tar langin, ram dang nena inkal pawhna ramri hmun ruk (6)-ah khar a, duty dah a nih thu te, District Hospital Lawngtlai-a isolation ward ruahman fel a nih thu leh District Hospital leh PHC-ah te quarantine centre buatsaih a nih thu te, district dang atanga lo lutte endikna tur check point hmun thum - Thingkah, Sangau leh Chawngteah te buatsaih a nih thu te a sawi.

He thut khawmah hian COVID-19 hrileng laka Lawngtlai District a himna turin chawlhkar khat chhung tal chu inkharkhip a that thu sawi lan a ni a. CYLA hnuaia branch hrang hrangte'n an huam chhunga sawrkar thawhpuia hma an lakna hrang hrangte chhunzawm zelin, hriat tur pawimawhte a tam thei ang berin puangzar se, tih a ni.

Kohhran eng emaw zatin kohhran inkhawm leh programme dang chawlh lailawk an puan chu lawmawm an tih thu tar langin, a la ti ve lote pawh chhunzawm ve thuai tura ngen an ni a. State pawn atanga lo haw reng reng ni 14 tal mahni in lamah mi dang nen inawm pawlh lova inkhung hran tur a ni a, inkhungna tur pindan nei lote chu District Hospital-a quarantine centre buatsaihah awm theih a ni a, ei in leh damdawi leh an mamawh dangte sawrkarin a tum dawn a ni. Inkhung hrang tura tih zawm lo an awm erawh chuan The Mizoram Epidemic Diseases (COVID-19) Regulations, 2020 hmangin tih luihnaa khung theih an ni a, khawtlang hruaitu leh tlawmngai pawl lamte pawh hemi kawngah hian district thuneitute thawhpui tura beisei an ni.

Khualzin phur lirthei leh sumdawng lirthei hrang hrang - sumo, bus, taxi leh auto rickshaw te chu mi chi hrang hrangin an inhman tawm a nih avangin natna darh theihna remchang tak nia ngaih a ni a, tlan chhunzawm tawh rih lo tura ngen an ni.

Dawrkaite pawh bungrua chheprelh lo tur leh thil man tito lo tura hriattir an ni a. In sak leh hna dang pawh chawlhsan rih tura tih a ni. Rikrum thila chhawr theih turin YLA leh LSA atangin thalai leh zirlai eng emaw zat medical lama thuneitute'n zirtir se, tih a ni a. Mipui zawng zawng khawlaia chhuak tam lo tur leh ina tawm a, inlen pawh lo tura ngen an nih rualin, naupang kum 10 hnuai lam leh upa kum 60 chung lam te phei chu fimkhur leh zual tur leh pawn chhuak miah lo tura ngen leh hriattir an ni bawk.

India Prime Minister-in March ni 22 (Pathianni)-a zing dar 7 atanga zan dar 9 thleng tu mah pawn chhuak lo tura Janta Curfew a puan leh, tlai dar 5-ah COVID-19 hrileng beitu damdawi lam mi leh venhimna hna thawktute zahna leh chawimawina lantir nan mahni in theuhvah ri thei chi hrang hrang tihrik tur tih chu zawm theuh turin meeting chuan Lawngtlai District mipuite a ngen a ni.

He hunah hian District Medical Superintendent Dr Zothanpari Chhakchhuak chuan COVID-19 chungchanga an hma lakna leh hriat tur pawimawh hrang hrangte a sawi fiah bawk.