1402/2022-2023

Vawkhniahzawn thla ni 28, 2022: Vawiin khan Lawngtlai DC Conference Hall-ah Additional Deputy Commissioner Pu James Miahlung hovin State sawrkar leh Lai Autonomous District Council (LADC)-a Animal Husbandry & Veterinary (AH&Vety) hotute, sawrkar official pawimawh dangte leh Lawngtlai khawpui chhunga VC/Village Level Response Team ai awhte chu Lawngtlai khawpui chhunga vawk natna hri leng, African Swine Fever (ASF) chungchanga hma lak zel dan tur ngaihtuahin an ṭhu khawm.

Tunlai hian ASF hri leng chuan Lawngtlai District tuam chho mekin, Lawngtlai khawpui chhungah pawh ASF vanga vawk thi leh damlo a awm nual a. Official-te'n an sawi danin, tun dinhmunah Lawngtlai khawpui chhungah ASF vanga vawk thi 14 awm tawhin, ASF vanga tihhlum 29 a awm tawh a ni.

ASF laka himna tura sawrkar leh department hma lakna chu theih tawpa puibawm turin VC-te chu ngen an ni a. Hma lakna tur hrang hrang ruahman zingah, Lawngtlai khawpui chhunga vawk talh tur, AH&Vety mi thiamte aṭanga certificate neite pawhin an talh hmain an awmna veng VC-ah report hmasa zel se tih te, ASF chungchanga mipui leh vawk vulhtute hriat tur pawimawh puanzar tur State leh LADC-a AH&Vety Department lamin lo siam se tih leh VC-te'n an veng huam chhungah hmun dang aṭanga vawk la lut an hriat chuan a rang lamin DC-ah report theh lut ṭhin se tih te a tel a ni.

District administration aṭanga report-ah Pangkhua lama DC thupek bawhchhiaa vawk lak luh nia hriat chu police lamin an chhui mek thu ngaihthlak a ni a. Tun hnaia Lawngtlai khawpui chhunga vawk la lut nia rinhlelh mi pathum chu police-in an chhui chian hnuah pathum zinga pahnihin an la lut ngei tih finfiah a nih thu leh, hrem an nih theih nan chak taka hma lak mek a nih thu ngaihthlak a ni bawk.

Attachment

  • Loading attachment...