March ni 13-a Chakma Autonomous District Council (CADC)-a village council (VC) 88-a inthlanpui buatsaih tur leh Lai Autonomous District Council (LADC)-a Council Veng VC seat khat hnawh khah nana by-election buatsaih tura Nodal Officer-te leh Sector Officer-te chu vawiin khan Lawngtlai DC Conference Hall-ah District Election Officer Pi Shashanka Ala, IAS hovin an thu khawm.

Pi Shashanka Ala chuan inthlan muanawm leh felfai tak a awm theih nan nodal officer-te leh sector officer-te pawimawhzia sawiin, an mawhphurhna te tha taka hlen chhuak turin a chah a. NO leh SO te'n an tih tur hrang hrang a sawi fiah bakah, Asst District Election Officer Pu K. Laltlawmlova leh Election Officer Pu Lalremruata Sailo te paw'n hriat tur pawimawh hrang hrang an sawi bawk.

Village Council inthlan turah hian VC 88 awmna CADC chu sector 18-ah thenin, LADC hnuaia VC seat khat hnawh khahna tur Council Veng chu sector pakhatah siam a ni a. CADC-a polling station 88 awm zinga pahnih - Kamalanagar-III leh Kamalanagar-V te chu venhimna uluk zual ngaihna bik, sensitive polling station-a puan a ni.

He VC inthlanah hian March ni 13 zing dar 7-ah vote thlak tan a, tlai dar 4-ah khar tur a ni a. Vote thlak zawh fel rualin vote tlate hi chhiar chhunzawm nghal a ni ang.

Vawiin meeting zawh hnu hian sector officer-te chu training pek chhunzawm nghal an ni.