Lawngtlai Town Sanitation Task Force (LTSTF) bul tuma Lawngtlai khawpui chunga veng fai inelna buatsaih chu vawiin khan Lawngtlai DC Conference Hall-ah LTSTF Chairman, Lawngtlai Bawrhsap Pi Shashanka Ala, IAS hovin result puan niin, lawmman sem nghal a ni.

Pi Shashanka Ala chuan Lawngtlai khawpuiin hmuh theiha faina kawnga hma a sawn chu lawmawm a tih thu sawiin, Central Young Lai Association (CYLA)-in "Faina leh Thianghlimna" chu kumpuanah hial neia hma an lakna chu fakawm a tih thu leh chu chuan Lawngtlai District faina kawngah awmzia nei hlea a hriat thu a sawi a. Tun tuma inelna buatsaih hi a bul tanna chauh a ni a, lawmman beisei vang ngawta fai tur ni lovin, keimahni leh kan ram tan hriselna leh changkanna tur a nih avang zawka fai reng tur kan ni tiin, veng hrang hrang atanga VC leh YLA kal khawmte chu faina leh thianghlimna kawnga mipuite zirtir leh kaihruai zel turin a chah a. Faina leh thianghlimna kawnga hma lakna atan plastic lam chi leh paper (lehkha phek) hman tlem deuh deuh chu intihhmuh a, inzirtir a tul thu a sawi bawk.

Veng fai inelna result puan leh lawmman semna hun hi UD&PA hnuaia Lawngtlai District Project Officer hna chelhtu, SDO (Sadar) Pi Rochuangkimi Khenglawt, MCS chuan kaihruaiin, inelna buatsaih chhan a sawi fiah a. Veng fai inelna endiktu lam atangin Lawngtlai DIPRO Pu C. Lalhruaitluanga chuan inelna kalphung, endik dan leh an endikna atanga Lawngtlai khawpui faina leh thianghlimna chungchanga an thil hmuh te a sawi a. Endiktute hmuh danin Lawngtlai khawpui veng hrang hrangte chuan inelna hi an la thutakin, hma an la tha hle a, fai pawh an fai tlang hle a ni, a ti.

He veng fai inelna hi Lawngtlai khawpui chhunga veng 12 te tana buatsaih niin, March ni 5, 2019 atanga June ni 14, 2019 inkar chhung kalpui a ni a. Endikna ki atan inthiarna nei mumal lo awm lohna (open defecation free) veng an ni em, bawlhhlawh paih dan a felfai em, vantlang hmun pawimawh leh khawlaiah bawlhhlawh bawm an hung tha em, faina hnatlang vawi eng zat nge an thawh, mipuiin faina kawnga hma lakna an hre chiang em, hmuh theih maiin an fai tha em tih te hmangin endik an ni.

Lawngtlai Vengpui-II chu Lawngtlai khawpui chhunga veng fai berah puan niin, pahnihna Lawngtlai Vengpui leh pathumna Chawnhu te an ni a. Pakhatna hian Rs 30,000/- leh citation, pahnihnain Rs 20,000/- leh citation, pathumnain Rs 10,000/- leh citation te an dawn bakah, Swachh Bharat t-shirt eng emaw zat an dawng theuh bawk a. T-shirt hi lawmman semnaa kal zawng zawng pawh pek vek an ni.

Vawiin hun hmanah hian veng hrang hrang VC leh YLA hruaitute, CYLA Kumpuan Committee hruaitute, tlawmngai pawl dang hruaitute leh official-te an kal khawm a. CYLA Kumpuan Committee hruaitute hnen atang leh lawmman dawngtu veng ai awhte hnen atangin thu sawi ngaihthlak a ni bawk.

LTSTF hma lakna hian Lawngtlai khawpui chhunga office, sikul leh restaurant fai inelna buatsaih leh nghal a ni dawn a. Inelna hian June ni 26 atanga kumin Faina Hapta thleng huamin, lawmman hi Faina Hapta kharna hunah sem a ni ang.