Vawiin chawhnu khan Aizawl Young Men’s Christian Association Annual General Conference vawi 30 na chu E-in-C, PWD Conference Hall, Tuikhuahtlangah neih a ni a, Health & Family Welfare department Minister Dr R Lalthangliana, Ex-Regional Chairman ni bawk chuan khuallian niin a hmanpui.

Minister Dr R Lalthangliana chuan Aizawl YMCA chu North East Region a titha ber anni thei chu lawmawm a tih thu a sawi rualin YMCA chungchang zau zawka mipuiten an hriat a duh thu a sawi a,” Thil thatna leh hlutna kan hriat fuh tawh chuan kan pan hnaiin kan tel hreh ngai lova, mi tam zawkin YMCA thatna te an hriat chian zel chuan member pawh kan pun chak hle ka ring a ni”, a ti a, Mizoram district tina member tam zawk inziaklut an awm theih nan hma la zel turin a fuih bawk. Dr R Lalthangliana chuan ram danga YMCA ten changtlung taka hma an lak thin dan te tar langin, Aizawl YMCA tan pawha chung hmalakna hrang hrangte chu a awhpui thu a sawi a,” YMCA chu pawl leh kohhran bik awmlohna anih avangin hma lakna pawh zau taka kalpui theih a ni a, hruaitu tha tak tak kaihhruaina hnuaiah Aizawl YMCA hi kalpui a ni a, Regional mai bakah National level thleng a hruaitu ni thei pawh Aizawl YMCA hian alo nei tawh a ni” a ti a, Aizawl YMCA hruaitute inpekna fakawm a tih thu a sawi bawk.

Aizawl YMCA Annual General Conference vawi 30 na hi Pu PC Zoram Sangliana, President, Aizawl YMCA in a kaihruaia Dr Zohmangaiha, Former Regional Chairman leh Board of Directors chuan hunserh hmangin Er. K Lalsawmvela, Honorary General Secretary hnen atangin Aizawl YMCA chanchin leh dinhmun tlangpuite bakah an hmalakna hrang hrangte ngaihthlak a ni bawk. Pu Vanlalzuiliana, Treasurer in report tawi pein Pu Lalrobiaka, Vice President in lawmthu sawina hun a hmang a, Election of Board of Directors for 2019-2021 thlan chhuahna hun neih nghal a ni.

N.E Region huam chhungah hian affiliated YMCA 23 vel awmin, chungah chuan Good Standing YMCA ah Aizawl YMCA hi ala tel zel a, North-East Region pumpuiah Good Standing YMCA paruk awmin chungte chu Shillong, Aizawl, Tanhril, Nongtala, Guwahati leh Dimapur te anni. National Council of YMCAs of India kum 125-na lawmna programme ah khan, India ram a YMCA Regional Council 9 atanga Best YMCA pakhat theuh thlan chhuah niin Aizawl YMCA chu North-East Region YMCA atangin Best YMCA a thlan a ni. 2018 Annual Statistical & Annual Return a a lan dan chuan Aizawl YMCA ah hian Full Member 225 awm mekin, chung zingah chuan kum 18-29 inkar mipa 22 leh Hmeichhia 30, kum 30 chung lam mipa 134 leh hmeichhia 39 an awm a. N.E Region chhungah YMCA lianber nihna hauh in Shillong YMCA-in a dawt a ni. Member zingah hian full member a chhiar loh, Associate member, ringlomi 9 leh kum tlinglo 2 an awm bawk a. Full member zingah hian Life Member 193 awmin, Associate Member nen chuan 202 life member an awm a, tun term chhung hian life member thar 3 lak luh anni bawk.