Vawiin International Day against Drugs Abuse & Illicit Trafficking pual hian Police Department leh District Legal Service Authority tangkawp te chuan Drugs thatloh zia inzirtirna leh a dona lama signature campaign hun Serchhip Auditorium ah an buatsaih.

He hunah hian Legal Service Authority atangin Pi Ngursangzuali Sailo, Member Secretary & CJM te, Police Department atangin Pu PC Laltanpuia, Addl SP te, Medical atangin Dr. Zodinpuii, Medial Officer, OST  leh YMA aiawhten thusawina hun an hmang a.

Pi Ngursangzuali Sailo chuan, Mizoram chu Drugs Free society a siam theih nia a hriat thu leh chutiang khawtlang din tur chuan mitinin mawhphurhna kan neih thu a sawi a. Thubuai neia nun hman pawi dan leh zirlaite tan phei chuan nakin zela an hna zawnna thlenga a pawi theih dan te sawifiahin Drugs leh thil danga thubuai nei lo zawnga an nun veng fimkhur turin zirlai naupang kal khawmte a chah a ni. Vawiina Jail-a tang tam ber te hi ruihhlo kaihhnawih thubuai nei an nih thusawiin, tihchhin chu a ngawl vei tanna a nih thu a hrilh a ni. Pi Ngursangzuali Sailo hian International Day Against Drugs Abuse & Illicit Trafficking tobul leh Serchhip a hman a nih chhan te a sawifiah a. Kum 2019 a thupui atan “Health for Justice. Justice for Health” tih a nih thu a tarlang bawk.

Pu PC Laltanpuia, Addl. SP pawhin Police Department in ruihhlo beihna kawnga hma an lak dan tlangpui a sawifiah a. Serchhip chu ram lailia awm a nih avangin ruihhlo tawlhtuten an paltlang nasa tih a sawi a. Tun hnaia No 4 dapchhuah runpuia an man Hawng 95 zinga Hawng 52 chu Serchhip District chhunga man a nih thu a tarlang a ni. Serchhip District chhungah Police leh NGOs hrang hrang ten thawh hona tha tak kan neih avangin hnathawh a nuamin kan awlsam phah em em a, kan lawm hle a ni, a ti.

Dr. Zodinpuii, MO, Serchhip District Hospital pawhin a lem nena entirin ruihhlovin mihring te a khawih chhiat dan te entirna a pe a. Sub Headquarters YMA atangin Pu Lalzuiliana, Vice President chuan thusawina hun a hmang bawk.

He hunah hian kal khawm zirlai naupangten damdawi hmangsual lo tura intiamkamna (signature) campaign an nei nghal a ni. Vawiin vek hian Serchhipa High School leh Higher Secondary School tina zirlaiten an school theuhvah signature Campaign hi an nei ve bawk a. Tin, he ni denchhen vek hian tukin zingkarah khan Anti-Drugs Run Police leh zirlai naupang ten an buatsaih bawk a. Chhekhnai kawng atanga Bazar thleng an tlan a ni.

Vawiina International Day Against Drugs Abuse & Illicit Trafficking pual Awareness & Signature Campaign hi Pu Ramfangzauva, Dy. SP in a kaihruai a, zirlai naupang leh sawm bik mi thahnem tak an tel a ni.